आत्मसमर्पण ले पुनर्वास तक-पवन कुमार ह हिंसा के रद्दा छोड़ के जिनगी के नवा शुरुआत करिस
“विशेष आवास परियोजना ले मिलिस पक्का आशियाना”
रायपुर. छत्तीसगढ़ मा सुसासन सरकार के ‘माओवादी आत्मसमर्पण, पीड़ित राहत अउ पुनर्वास नीति-2025‘ ह हिंसा छोड़ के मुख्यधारा मा जुड़इया नक्सली मन ला नवा जिनगी देवत हे। छत्तीसगढ़ सरकार ह आत्मसमर्पण करइया मन ला 5 लाख तक के सहायता, कौशल ट्रेनिंग, अउ मान-सम्मान के जिनगी दे के नक्सल-मुक्त बस्तर के सपना ला साकार करत हे। कोण्डागांव जिला के फरसगांव, सुदेर पंचायत चिंगनार के पवन कुमार ला पुनर्वास नीति के तहत पक्का घर मिले ले ओकर जिनगी मा एक बड़े बदलाव आईस हे।
कोण्डागांव जिला के फरसगांव ब्लॉक के दूरिहा गांव चिंगनार, जेहा मुख्यालय ले लगभग 45 किलोमीटर दूर हे, कभू ए इलाका मा माओवाद के डर अउ असुरक्षा के माहौल रिहिस। अब ए क्षेत्र मन मा राज्य सासन के पुनर्वास नीति ले सांति अउ विकास आवत हे। इही गांव के रहइया पवन कुमार ला पक्का घर मिले ले ओकर जिनगी बदल गे हे। पवन कुमार पहिली माओवादी संगठन मा जुड़े रिहिस, ओ बेरा ओकर जिनगी खतरा अउ दुख-तकलीफ ले भरे रिहिस। ओकर परिवार ह जंगल के तीर एक झोपड़ी अउ जर्जर कच्चा मकान मा रहे बर मजबूर रिहिस, जिहां न त कोनो सुविधा रिहिस अउ न ही सुरक्षित भविष्य के कोनो आस।
समय के संग ओला अहसास होइस कि हिंसा के रद्दा सिरिफ़ विनाश कोती ले जाथे। सासन के आत्मसमर्पण अउ पुनर्वास नीति ले प्रेरित हो के ओहा एक साहसिक फैसला लीस अउ माओवादी संगठन ला छोड़ के समाज के मुख्यधारा मा लौटे के निरनय लीस। ये फैसला ओकर जिनगी के सबले बड़े मोड़ साबित होइस।
आत्मसमर्पण के बाद जिला प्रशासन डहर ले ‘विशेष परियोजना आवास (आत्मसमर्पित परिवार)‘ प्रधानमंत्री आवास योजना ग्रामीण के तहत बछर 2024-25 मा ओला घर स्वीकृत करे गिस। सासन डहर ले ओला किश्तवार आर्थिक मदद दिए गिस, जेमा पहिली किश्त 40 हजार, दूसरी 55 हजार अउ आखिरी किश्त 25 हजार रूपया रिहिस। एकरे संग मनरेगा के तहत 90 दिन के मजदूरी घलो दिए गिस। ए सबो सहायता ले पवन कुमार ह समय मा अपन पक्का घर बना लीस। ये घर सिरिफ़ एक मकान नो हे, बल्कि ओकर नवा जिनगी के मजबूत नींव आय। अब ओकर परिवार सुरक्षित हे अउ भविष्य बर घलो निसचिंत हे।
एकर अलावा सासन डहर ले ओकर घर मा बिजली कनेक्शन, रसोई गैस, शौचालय अउ नल-जल जइसन बुनियादी सुविधा घलो दिए गे हे। ए सुविधा मन ले ओकर जिनगी के स्तर सुधर गे हे अउ ओला एक मान-सम्मान के जिनगी जिये के मउका मिलिस हे। आज पवन कुमार अपन परिवार के संग सांति, सुरक्षा अउ खुसी ले जियत हे। ओहा सासन-प्रसासन के ए पहल बर आभार मानत हुए प्रधानमंत्री अउ मुख्यमंत्री ला धन्यबाद कहिस हे।
