उद्योग अउ श्रम विभाग के आपसी तालमेल ले संवरत हे – छत्तीसगढ़

(उद्योग अउ श्रम मंत्री लखनलाल देवांगन जी के जनम दिन के मउका मा खास)

छगन लाल लोन्हारे उप संचालक जनसम्पर्क

रायपुर. मुख्यमंत्री विष्णुदेव साय के अगुवाई मा राज्य सरकार ह जे साफ़ नीति के साथ मजदुर मन अउ उद्योग मन के एक साथ विकास ला पहिली जगा दीस हे, ओहा आज ठोस रिजल्ट के रूप मा दिखत हवय। श्रम विभाग के योजना मन मा ए भावना साफ़ झलकथे कि मजदुर मन सिरिफ एक आर्थिक इकाई नो हें, बल्कि समाज के नींव आयं। उंखर जिनगी मा थिरता,सम्मान अउ सुरक्षा लाना ही असली विकास के निसानी आय। 12 अप्रैल के ए खास दिन उद्योग अउ श्रम मंत्री लखनलाल देवांगन जी के लगन, काम करे के सक्ती अउ जनसेवा के भावना ला सुरता करे के दिन आय। आप मन के नीक अगुवाई ले ही छत्तीसगढ़ ह आगू बढ़त, खुशहाली अउ सबला बरोबर मउका देय वाला एक आदर्स राज्य बनके उबरे हवय।

2026 रजत जयंती बछर मा छत्तीसगढ़ के विकास के ए रददा सिरिफ योजना अउ घोसना मन के कहानी भर नोहे, बल्कि एहा एक अइसन अगुवाई (नेतृत्व) के गोठ आय जेहा मजदुर, जवान, उद्योगपति अउ समाज के हर वर्ग ला संग मा लेके आगू बढ़े के संकलप लीस हे। ए बदलाव के बखत मा उद्योग अउ श्रम मंत्री लखनलाल देवांगन जी के योगदान ह खास रूप ले सराहनीय हवय। उंखर काम सिरिफ सरकारी दफ्तर तक सीमित नइ हे, बल्कि एहा सामाजिक संवेदनशीलता अउ दूरदेसी सोंच के एक जीता-जागता मिसाल आय।छत्तीसगढ़ सरकार ह 25 बछर के थोरिक उमिर मा उद्योग के छेत्र मा जे नवा इतिहास रचे के संकलप लीस हे, ओहा कोनो ले लुकाय नइ हे। उद्योग के दुनिया मा आज छत्तीसगढ़ के अपन एक अलग पहिचान हवय। नवा उद्योग नीति (2024-2030) मा छत्तीसगढ़ के सब्बो डहर ले विकास (समावेशी विकास) ऊपर जादा जोर दिय गे हवय।

मजदुर मन ला ताकतवर बनाय के दिसा मा उठाय गे कदम मा सबले प्रेरणा देय वाला काम हवय—मजदुर मन के लइका मन ला बढ़िया स्कूल मा मुफ्त (निःशुल्क) शिक्षा दिलाना। एहा सिरिफ एक ठन योजना भर नोहे, बल्कि बदलाव के ओ रद्दा आय जेखर ले आने वाला नवा पीढ़ी ह ज्ञान अउ मउका मन के मदद ले अपन सुनहरा अउ सुरक्षित भविसत ला खुद गढ़ सकय।आज के बखत मा मजदुर के लइका मन के राज के बड़े-बड़े स्कूल मा पढ़ई करना, एक नवा छत्तीसगढ़ के मूरत ला देखाथे। एखर संग मा, जऊन लइका मन मेरिट मा आथें, ओमन ला लाखों रूपया के प्रोत्साहन रासी देना सरकार के ओ सोंच ला देखाथे जेमा काबिलियत (प्रतिभा) के सनमान सबले ऊपर हवय। एहा सिरिफ ओ लइका मन बर गरब के बात नोहे, बल्कि पूरा मजदुर समाज बर आतम-बिसवास के एक बड़े जरिया घलो आय।

उद्योग अउ श्रम विभाग डहर ले आर्थिक मजबूती के छेत्र मा घलो बड़े काम होय हवय। पिछला दू बछर मा सैकड़ों करोड़ रूपया सीधा मजदुर मन के खाता मा डाले गे हवय, जेखर से न केवल काम-काज मा सफागोई (पारदर्शिता) आई हवय, बल्कि सरकार के योजना मन के असली फायदा घलो सिधुआत हवय। रोज दिन हजारों मजदुर मन ला अलग-अलग योजना के लाभ मिलना ए बात के परमान आय कि सरकार के नीति मन भुइँया स्तर मा बढ़िया ढंग ले लागू होवत हें।

मजदुर मन के जिनगी ला जादा सुरक्षित अउ सनमान वाला बनाय बर अवास सहायता (मकान बर मदद), सहीद वीर नारायण सिंह श्रम अन्न योजना, अउ दुर्घटना मा तुरत आर्थिक मदद जइसन कदम मन बहुत जरूरी हें। खास करके ’श्रम अन्न योजना’ के तहत सिरिफ 5 रूपया मा गरम अउ पौष्टिक भोजन दियौना, एक मानुसपन अउ संवेदनसील सरकार के निसानी आय।उद्योग के विकास के छेत्र मा घलो मंत्री लखनलाल देवांगन जी के अगुवाई मा छत्तीसगढ़ ह नवा ऊँचाई ला छुय हवय। नवा उद्योग नीति 2024-30 के जरिया ले राज मा निवेशक मन ला बढ़ावा देय अउ रोजगार के नवा मउका बढ़ाए बर ठोस कदम उठाय गे हवय। करोड़ों रूपया के निवेश के नेवता, सैकड़ों नवा कारखाना मन के स्थापना अउ हजारों जवान मन ला रोजगार मिलना ए नीति के सफलता ला परमानित करथे।

नवा रायपुर मा देस के पहिली एआई (AI) डाटा सेंटर बनाय के कोति बढ़त कदम, सेमीकंडक्टर अउ आईटी जइसन नवा छेत्र मा निवेश, अउ स्टार्टअप नीति ला लागू करना—ए सब्बो काम छत्तीसगढ़ ला पुरान आर्थिक बेवस्था ले आगू बढ़ा के आधुनिक तकनीकी जुग मा खड़ा करत हवय। ए बदलाव सिरिफ आर्थिक नोहे, बल्कि समाज के ढांचा ला घलो नवा दिसा देय वाला आय।

प्रसासनिक सुधार के छेत्र मा ई-निविदा (E-Tender) अउ सिंगल विंडो सिस्टम जइसन कदम मन ले सफागोई (पारदर्शिता) बाढे हवय, जेखर ले निवेशक मन के बिसवास मजबूत होय हे अउ राज मा बेपार करे के तरीका ह सउंखा (सरल) बन गे हवय। इही कारण आय कि छत्तीसगढ़ आज निवेशक मन बर एक बढ़िया जगा बनत जावत हवय।

सामाजिक जुड़ाव (समावेशन) ला छत्तीसगढ़ सरकार ह अपन विकास के रददा मा एक बहुत जरूरी हिस्सा बनाय हवय। माई लोगन (महिला) उद्यमी मन ला बढ़ावा देना, काम-काज करइया महिला मन बर हॉस्टल अउ दुरिहा इलाका मन मा उद्योग लगाय के योजना मन ए बात ला पक्का करथें कि विकास के फायदा समाज के हर वर्ग तक पहुँचे। असल मा, कोनो घलो राज के असली तरक्की ओखर सामाजिक जुड़ाव ऊपर ही टिके रहिथे।

उद्योग अउ श्रम मंत्री लखनलाल देवांगन जी ह अपन गंभीर सोंच, दूरदेसी अउ बिभागी जिम्मेदारी के जरिया ले ए बात ला सच करके देखाय हें कि अगर अगुवाई मा संवेदनशीलता अउ साफ़ नजरिया होय, त विकास सिरिफ आँकड़ा मन तक नइ रहय, बल्कि मनखे मन के जिनगी मा असली बदलाव लाथे। उहें, मुख्यमंत्री विष्णुदेव साय सरकार के देख-रेख मा ए बदलाव ह अउ जादा मजबूत अउ बड़े रूप लेवत हवय।