‘गांव चलो अभियान’ के तहत जनसंवाद, समस्या मन ला तुरंते सुलझाय बर जोर
- रायगढ़ विधानसभा के 05 गांव मन म अलग-अलग विकास काम मन के करिन लोकार्पण-भूमिपूजन
- रायगढ़ के गांव-गांव म विकास ला मिलिस नवा गति: वित्त मंत्री ह करोड़ों रुपिया के काम मन के दीन सौगात
रायपुर. जिला के गांव-देहात म बुनियादी सुविधा मन ला बढ़ाय बर प्रदेश के वित्त मंत्री अउ रायगढ़ विधायक ओ.पी. चौधरी ह रायगढ़ विधानसभा के अलग-अलग गांव मन म करोड़ों रुपिया के विकास काम मन के लोकार्पण अउ भूमिपूजन करिन। “गांव चलो अभियान” के तहत क्षेत्र के दौरा म पहुंचे वित्त मंत्री ह कहिन कि सरकार के उद्देश्य विकास ला आखिरी मनखे तक पहुंचाना हे अउ एखर बर लगातार जमीनी स्तर म काम करे जात हे।
ए बेरा म ग्राम सूरजगढ़ म लगभग 192.92 लाख रुपिया के खरचा ले बने सूरजगढ़-पड़िगांव ले तेलीपाली सड़क के लोकार्पण करे गय, जेखर ले इलाका के मनखे मन ला बड़ राहत मिलही अउ रददा म आवन-जावन ह सुग्घर अउ आसान हो जाही।अइसने, ग्राम टिनमिनी म 12 लाख रुपिया के लागत ले एक ठन शेड अउ 5.20 लाख रुपिया के लागत ले विक्रम के घर ले स्कूल तक सीसी रोड (समेंट रोड) के लोकार्पण करे गय। ए मउका म 12वीं कक्षा के पढ़इया लइकी अंजली सतपति ला ओखर पढ़ाई-लिखाई म बढ़िया प्रदर्शन बर सम्मानित घलो करे गय।ग्राम पंचायत नावापाली म घलो 7.50 लाख रुपिया के लागत ले बने सांस्कृतिक शेड के लोकार्पण होयिस, जेखर ले गांव वाले मन ला अपन सामाजिक अउ सांस्कृतिक कार्यक्रम मन ला करे बर पहिली ले अउ बढ़िया सुविधा मिलही।
एही कड़ी म पड़िगांव म जगन्नाथ मंदिर के तीर 7 लाख रुपिया के लागत ले बने शेड के लोकार्पण करे गय। संग म इहां 20 लाख रुपिया के लागत ले बनइया सामुदायिक भवन अउ चौहान मोहल्ला म 10 लाख रुपिया के शेड निर्माण काम के भूमिपूजन घलो करे गय। ग्राम गुडू के वार्ड नंबर 01 म 10 लाख रुपिया के लागत ले बने सीसी रोड के लोकार्पण होयिस, त ओही जा 10.40 लाख रुपिया के लागत ले बनइया एक ठन अउ सीसी रोड के भूमिपूजन करे गय।
वित्त मंत्री ओ.पी. चौधरी ह टिनमिनी संग आने गांव मन म “गांव चलो अभियान” के तहत चौपाल लगाके गांव वाले मन ले सीधा गोठ-बात करिन, ओ मन के दुख-पीरा अउ समस्या ला सुनिन अउ अधिकारी मन ला ओला तुरंते अउ बढ़िया ढंग ले सुलझाय बर निरदेस दीन। ओ मन कहिन कि सरकार विकास बर पूरी कोति ले समर्पित हे अउ ए सब काम ले न केवल बुनियादी सुविधा सुधरही, बल्कि गांव के अरथ-बेवस्था ला घलो नवा मजबूती मिलही। ए मउका म स्थानीय जनप्रतिनिधि, मान-गौन मनखे, गांव के सरपंच, अधिकारी-करमचारी अउ बड़ संख्या म गांव वाले मन उपस्थित रहिन।
