सिंघीतराई प्लांट हादसा: कैबिनेट मंत्री लखन लाल देवांगन ह घायल मन के जानिस हाल-चाल, बने इलाज बर दीस निर्देश
मुख्यमंत्री के निर्देश मा घायल मन के होवत हे बढ़िया इलाज, प्रशासन हवय पूरा सक्रिय
मरे अउ घायल मन बर आर्थिक सहायता अउ रोजगार के घोषणा, मजिस्ट्रियल जांच के आदेश
रायपुर .छत्तीसगढ़ सासन के वाणिज्य उद्योग, श्रम, आबकारी अउ सार्वजनिक उपक्रम विभाग के कैबिनेट मंत्री लखन लाल देवांगन ह आज गुरुवार के दिन रायगढ़ जिला के सरकारी अउ निजी अस्पताल मन के दौरा करिन। उमन सिंघीतराई वेदांता प्लांट हादसा मा घायल मजदूर मन के हाल-चाल जानिन अउ उंकर झटकुन बने होय के कामना करिन।
मंत्री जी ह अस्पताल प्रबंधन ला कड़ा निर्देश दीन कि:”सबो घायल मन ला बढ़िया से बढ़िया अउ सही इलाज मिलना चाही, एमा कोनो कमी झन होवय।”दौरा के बखत उमन गांव वाले मन ले घलो गोठ-बात करिन अउ उंकर हाल-चाल पूछिन। अस्पताल मा भरती मजदूर मन ह बताइन कि उंकर इलाज बने ढंग ले होवत हे। बता दन कि मंत्री श्री देवांगन ह आज रायगढ़ जिला के एक दिन के प्रवास मा रहिन।
श्रम मंत्री लखन लाल देवांगन ह बताइन कि ग्राम सिंघीतराई मा बने वेदांता प्लांट मा 14 अप्रैल के दिन भारी अब्बड़ दुर्घटना होय रिहिस, जेमा कतको झन मजदूर मन प्रभावित होइन। घटना के खबर मिलतेच जिला प्रशासन ह तुरते सक्रिय होगे। कलेक्टर, पुलिस अधीक्षक अउ उंकर प्रशासनिक टीम ह मउका मा पहुंच के रेस्क्यू (बचाव) के काम सुरू करिन।
घायल मन ला पहली प्राथमिकता देवत रायगढ़ के फोर्टिस अस्पताल, मेट्रो, मेडिकल कॉलेज अउ अपेक्स अस्पताल मा भरती कराय गिस। उहें, जेकर हालत जादा गंभीर रिहिस, उमन ला बने इलाज बर रायपुर के कालड़ा अस्पताल रिफर करे गे हवय।
मुख्यमंत्री ह घलो ए घटना ऊपर सुध-बुध लेवत भारी चिंता जताइन अउ पूरा घटना के मजिट्रियल जांच के निर्देश दीन। जांच मा जउन घलो दोषी पाही जाही, उंकर ऊपर श्रम कानून के तहत कड़ा ले कड़ा कार्रवाई करे जाही।
ए हादसा मा कुल 36 मजदूर मन ऊपर गाज गिरिस हे, जेमा ले 20 झन परलोक सिधार गे हवंय, अउ 16 झन घायल हवंय जेकर इलाज अभी चलत हे। मुख्यमंत्री ह मरे वाला मन के परिवार ला 5-5 लाख रुपिया अउ घायल मन ला 50-50 हजार रुपिया सहायता राशि देके घोसना करिन हे। उहें, प्रधानमंत्री डाहर ले घलो मरे वाला मन के परिवार ला 2 लाख अउ घायल मन ला 50 हजार रुपिया के मदद मंजूर करे गे हवय।
इति, कंपनी प्रबंधन ह घलो दुखिया परिवार मन के संग खड़ा होय के भरोसा दिलाइस हे। कंपनी डाहर ले मरे वाला मजदूर मन के परिवार ला 35 लाख रुपिया के आर्थिक मदद अउ नौकरी-चाकरी मा सहयोग, अउ घायल मन ला 15 लाख रुपिया के सहायता राशि दिये जाही। संग मा, घायल मन जब तक पूरा ले बने (स्वस्थ) नहीं हो जावंय, तब तक उंकर तनखा जारी रही अउ उमन ला काउंसलिंग के सुविधा घलो दिये जाही।
