उद्योग मंत्री लखन लाल देवांगन ह महिला थाना के करिन लोकार्पण
रायपुर. उद्योग मंत्री लखन लाल देवांगन ह सुकवार ला कोरबा के सिविल लाइन थाना परिसर म कोरबा जिला के पहिली महिला थाना के फीता काटके विधिवत सुरूवात करिन। ए मौका म मंत्री श्री देवांगन ह कहिन कि ए थाना ह जिला के पहिली महिला थाना होही, जउन ह न केवल महिला मन के खिलाफ होय वाले अपराध ला रोके म मदद करही, बल्कि ओमन के सिकायत के झटकुन निपटारा घलो तय करही। मंत्री श्री देवांगन ह थाना के सुरूवात करे के बाद निरीक्षक भावना खांडेकर ला थाना प्रभारी के विधिवत पदभार ग्रहण कराइन। ए थाना म थाना प्रभारी के संग जवान मन के घलो तैनाती करे गे हे।
मंत्री श्री देवांगन ह कहिन कि ए महिला थाना ह महिला मन के सुरक्षा ला पहिली प्राथमिकता देय वाला एक ठन बड़े पहल आय। ए महिला थाना के उदेस्य ए तय करना हे कि महिला मन ला अपन अधिकार के रक्षा बर एक ठन सुरक्षित जगह मिल सके। ए मौका म मंत्री श्री देवांगन ह अलग-अलग परीक्षा म बढ़िया प्रदर्शन करइया ए परिवार के लइका मन के सम्मान करिन। थाना परिसर म एक ठन वाटर कूलर लगाए के घलो घोसणा करिन। एकर संग ही, गरमी म आम तौर म लगे वाला आग ले बचाव के उपाय बर पाम्पलेट के घलो विमोचन करिन।
ए मौका म महापौर संजू देवी राजपूत, जिला पंचायत के अध्यक्ष पवन सिंह, कलेक्टर कुणाल दुदावत, पुलिस अधीक्षक सिद्धार्थ तिवारी, प्रीति स्वर्णकार, पार्षद अशोक चावलानी, पार्षद चंद्रलोक सिंह, योगेश जैन के संग आन गणमान्य मनखे मन बड़ संख्या म उपस्थित रहिन।
