4.19 लाख ले जादा जांच, 4272 मरीज ल मिलिस विशेषज्ञ इलाज – मुख्यमंत्री स्वस्थ बस्तर अभियान ले दूरिहा-देहात तक पहुँचत हे मजबूत स्वास्थ्य सुबिधा

गाँव-गाँव पहुँचके स्वास्थ्य सुबिधा देवत हें टीम, मरीज मन के होवत हे बने इलाज

रायपुर. बस्तर संभाग के दूर-दराज अउ दुर्गम इलाका म स्वास्थ्य सुबिधा ल मजबूत अउ आसान बनाये बर चलाये जात ‘मुख्यमंत्री स्वस्थ बस्तर अभियान’ के बने परिणाम आथ हे। ए अभियान के तहत स्वास्थ्य विभाग के टीम ह गाँव-गाँव पहुँचके अब तक 4,19,898 ले जादा मनखे मन के स्वास्थ्य जाँच (स्क्रीनिंग) कर डारे हें, जेकर ले बड़े संख्या म मनखे मन ल बखत म इलाज के लाभ मिलत हे।

अभियान के बखत जे मनखे मन म बीमारी के लच्छन मिलत हे, ओमन ल तुरते मुफ्त जाँच, दवई अउ इलाज देय जात हे। संग च, जे मनखे मन के बीमारी ह गंभीर हे, ओइसन 4,272 मरीज मन ल बड़े अस्पताल म रेफर करके विशेषज्ञ ले इलाज करवाय गे हे। एकर ले दूरिहा रहे वाला मनखे मन ल घलो सही समय म बने चिकित्सा सुबिधा मिलत हे।

स्वास्थ्य सुबिधा ल अउ मजबूत करे बर प्राथमिक स्वास्थ्य केंद्र, सामुदायिक स्वास्थ्य केंद्र, जिला अस्पताल, मेडिकल कॉलेज अउ सुपर स्पेशियलिटी अस्पताल के बीच तालमेल बनाके एक बढ़िया तंत्र तइयार करे गे हे। मोबाइल मेडिकल यूनिट अउ नियम ले लगाये जात स्वास्थ्य सिबिर (शिविर) के माध्यम ले ओ इलाका म घलो पहुँचाय जात हे जहाँ पहुँचना मुस्किल रहिथे।

ए अभियान के तहत हर नागरिक के डिजिटल स्वास्थ्य प्रोफाइल (आभा) तइयार करे जात हे, जेकर ले आघू चलके ओकर इलाज म आसानी होही। स्वास्थ्य मंत्री म बिहारी जायसवाल जी ह बताइन कि

“मुख्यमंत्री स्वस्थ बस्तर अभियान के तहत लगातार गाँव-गाँव पहुँचके मनखे मन के स्वास्थ्य जाँच करे जात हे। हमर लच्छ (लक्ष्य) हे कि हर नागरिक तक स्वास्थ्य सुबिधा पहुँचय अउ सब्बो झन के जाँच होवय। विभाग ह मरीज मन ल बने इलाज देय बर पूरी ताकत ले लगे हे। ए अभियान ह बस्तर म स्वास्थ्य सेवा मन ल नवा रद्दा देखावत हे।”

राज्य सरकार के संकल्प अउ स्वास्थ्य विभाग के मेहनत ले ए अभियान के बढ़िया नतीजा मिलत हे, जेकर ले बस्तर के लोगन मन ल नीक स्वास्थ्य सेवा मिले म मदद मिलत हे।