साकेत भवन में कर्मचारी राज्य बीमा औषधालय ह लगाइस खास सेहत जागरूकता अउ जांच सिबिर

महापौर संजूदेवी राजपूत ह करिन सिबिर के समापन; मुख्यमंत्री विष्णुदेव साय अउ श्रम मंत्री लखनलाल देवांगन के मानिन आभार

अफसर अउ कर्मचारी मन के होइस सुघर जांच, बीमारी के हिसाब से मिलिस दवाई, डाक्टर मन दीन जरूरी सलाह

रायपुर. मुख्यमंत्री विष्णुदेव साय अउ श्रम मंत्री लखनलाल देवांगन के निर्देश के मुताबिक, प्रदेश के असंगठित क्षेत्र के मजदूर अउ ओमन के परिवार के सेहत बर चलाए जावत अभियान के तहत, काली सुकवार के दिन कर्मचारी राज्य बीमा औषधालय कोरबा डहर ले निगम कार्यालय ‘साकेत’ में खास सेहत जागरूकता अउ जांच सिबिर लगाए गिस। महापौर संजूदेवी राजपूत ह सिबिर के समापन करिन अउ मुख्यमंत्री अउ श्रम मंत्री के आभार जतावत कर्मचारी राज्य बीमा औषधालय के काम के बड़ाई करिन।

मुख्यमंत्री के मार्गदर्शन अउ श्रम मंत्री के दिशा-निर्देश में ‘कर्मचारी राज्य बीमा सेवा’ डहर ले जम्मो छत्तीसगढ़ के असंगठित मजदूर बर अइसन सिबिर लगाए जावत हे। एही कड़ी में नगर पालिक निगम कोरबा के साकेत भवन में बुधवार के बिहनिया 11 बजे ले संझा 5 बजे तक सिबिर चलीस, जेमा निगम के 500 ले जादा अफसर अउ कर्मचारी मन अपन सेहत के जांच कराइन। ब्लड प्रेशर, सुगर, जोरो के पीरा, मुड़ पीरा, नींद नई आना, हाईपरटेंशन, बुखार, एलर्जी, लीवर, किडनी अउ हिरदे (हृदय) ले जुड़े बीमारी के जांच होइस। सिबिर में दवाई मन के पूरा इंतजाम रिहिस। डाक्टर मन जरूरत के हिसाब से दवाई बांटिन अउ सेहतमंद रहे के उपाय बताइन।

महापौर संजूदेवी राजपूत ह सिबिर के समापन करत बखत कहिन कि मुख्यमंत्री अउ उद्योग/श्रम मंत्री के ए पहल ले कर्मचारी मन ल बड़ लाभ मिलत हे। ए सिबिर में नोडल अधिकारी डॉ. दिग्विजय बहादुर सिंह, डॉ. नीरज तिवारी, डॉ. ओमदत्त तिवारी समेत स्टाफ नर्स अउ फार्मासिस्ट अपन सेवा दीन।

सिबिर के समापन में मेयर इन काउंसिल के सदस्य अजय कुमार चन्द्रा, ममता यादव, फिरत राम साहू, योगेश मिश्रा, पूर्व पार्षद दीपक यादव, रामशंकर साहू, अधीक्षण अभियंता सुरेश बरूआ, लेखाधिकारी भवकांत नायक, स्वास्थ्य अधिकारी डॉ. संजय तिवारी अउ निगम के आन कर्मचारी मन मौजूद रिहिन।