अपन जिम्मेदारी निभाव अउ अपन बेटी मन ल सर्वाइकल कैंसर के खतरा ले बचावा
छत्तीसगढ़ के बड़ कदम: अब गर्भाशय ग्रीवा कैंसर ऊपर होही आखिरी वार
रायपुर. बेटी मन के हाँसी-मुसकान में ही भविष्य के सबले सुघर तस्वीर बसे रहिथे। ए हाँसी ल सुरक्षित रखे के संकलप के साथ छत्तीसगढ़ में एचपीवी (ह्यूमन पैपिलोमा वायरस) टीकाकरण कार्यक्रम के सुरूवात करे गे हे। ए पहल सिरिफ एक ठन सरकारी योजना नई आय, बल्कि हर ओ महतारी-बाप के बिसवास के रक्षा आय, जेमन अपन बेटी के बढ़िया सेहत अउ सुरक्षित कल के सपना देखथें।
भारत सरकार के अगुवाई में चलत ए अभियान ले जुड़के छत्तीसगढ़ अब ओ जम्मो राज्य के साथ कदम मिलावत हे, जेमन गर्भाशय ग्रीवा (सर्वाइकल) कैंसर ल जड़ ले मिटाय के बीड़ा उठाए हें। महिला मन में होय वाला कैंसर में सर्वाइकल कैंसर ह दूसरा सबले आम कैंसर आय। ए ह मुख्य रूप ले ‘ह्यूमन पैपिलोमा वायरस’ (HPV) के संक्रमण ले होथे। एकर सुरूआती दिन मन में कोनो साफ लच्छन नई दिखे, जेकर सेती अक्सर ए ह गंभीर बेरा में पता चलथे।
HPV टीकाकरण ए गंभीर कैंसर के खिलाफ एक मजबूत अउ भरोसा के सुरक्षा कवच आय। बिज्ञान ह एला प्रमाणित करे हे कि ए टीका ह पूरा सुरक्षित अउ बड़ असरदार हे। एकर कोनो खराब असर (साइड इफेक्ट) नई दिखे हे, जेकर सेती ए ह पूरा बिसवास के लायक हे। ए टीका ह सिरिफ आज बर नई, बल्कि आने वाला कई साल तक कैंसर के खतरा ल कम करे बर दीर्घकालिक सुरक्षा देथे।
प्राइवेट अस्पताल में एचपीवी टीका के एक खुराक के कीमत लगभग 4,000 रुपया तक होथे, जेला हर परिवार बर दे पाना आसान नई हे। पइसा के कमी के सेती बेटी मन ए जरूरी सुरक्षा ले वंचित झन रह जांय, एकर बर छत्तीसगढ़ सरकार ह बड़ संवेदनसील फैसला लिस हे। सरकार के संकल्प हे कि कोनो भी बेटी पइसा के अभाव में ए टीका ले झन छूटय, एखर सेती पात्र किशोरी मन ल ए टीका बिल्कुल मुफ्त (निःशुल्क) लगाए जावत हे।
ए टीकाकरण राज्य के जम्मो सरकारी मेडिकल कॉलेज, जिला अस्पताल, सामुदायिक स्वास्थ्य केंद्र अउ प्राथमिक स्वास्थ्य केंद्र मन में उपलब्ध हे। प्रशिक्षित स्वास्थ्य कर्मचारी अउ ‘यू विन’ (U-Win) डिजिटल प्लेटफॉर्म के जरिए हर लाभार्थी तक ए सेवा ल पारदर्शिता के साथ पहुंचाय के इंतजाम करे गे हे।
स्वास्थ्य विभाग जम्मो अभिभावक अउ जागरूक नागरिक मन ले अपील करथे कि ओमन ए अभियान में बढ़-चढ़के हिस्सा लेवें। ए ह सिरिफ एक टीकाकरण नई आय, बल्कि अपन बेटी मन ल एक अइसन खतरा ले बचाय के जिम्मेदारी आय, जेला रोके जा सकथे।
