युवा फेस्ट 2026 के बढ़िया असर:
स्थानीय मंच ले राष्ट्रीय पहचान: छात्र के चयन होइस आईटी कंपनी म
AI वर्कशॉप के नतीजा: 12वीं के छात्र ला बेंगलुरु म मिलिस इंटर्नशिप
रायपुर. धमतरी म 24-25 अप्रैल के आयोजित ‘युवा फेस्ट 2026’ के सकारात्मक नतीजा अब दिखे बर धर लीस हे। ए आयोजन ह युवा मन बर नवा रस्ता खोले वाला साबित होवत हे। ए कड़ी म आयोजित आर्टिफिशियल इंटेलिजेंस (AI) वर्कशॉप ले एक बड़ प्रेरणादायक सफलता के कहानी आगू आइस हे।
अभनपुर के रहइया 12वीं कक्षा के छात्र प्रतीक ताम्रकार के चयन बेंगलुरु के TEKNIKOZ Software Private Limited म समर इंटर्नशिप बर होय हे। ए मौका ओला युवा फेस्ट के बखत AI वर्कशॉप म ओखर बढ़िया प्रदर्शन अउ तकनीकी समझ के आधार म मिले हे। प्रतीक ह अब आने वाला दो महीना (अप्रैल ले जून 2026) तक कंपनी के संग काम करके प्रैक्टिकल अनुभव हासिल करही।
कार्यक्रम मां बेंगलुरु ले आय विशेषज्ञ मन के टीम ह युवा मन ला आर्टिफिशियल इंटेलिजेंस, डिजिटल स्किल्स, स्टार्टअप इकोसिस्टम अउ आधुनिक तकनीक के जानकारी दीन। वर्कशॉप म लइका मन ला ‘हैंड्स-ऑन ट्रेनिंग’ अउ प्रोजेक्ट बनाय के घलो मौका मिलिस। प्रतीक ह अपन नवा सोच अउ सीखे के लगन ले प्रशिक्षक के दिल जीत लीस, जेखर से ओला ए बड़ मौका मिलिस।
कलेक्टर अबिनाश मिश्रा ह प्रतीक ताम्रकार ला ए उपलब्धि बर बधाई दीन अउ ओखर उज्ज्वल भविष्य के कामना करिन। ओमन कहिन कि:”युवा फेस्ट के मतलब सिरिफ आयोजन करना नई हे, बल्कि युवा मन के हुनर ला पहचान के ओमन ला सही मंच देना आय। प्रतीक के सफलता ए बात के सबूत हे कि अगर सही रस्ता अउ मौका मिलय, त गांव अउ छोटे सहर के लइका मन घलो देश के बड़े-बड़े स्तर म अपन पहिचान बना सकथें।”
कलेक्टर ह जिला के अऊ दूसर युवा मन ले घलो अपील करिन कि ओमन अइसन नवाचार अउ कौशल वाले कार्यक्रम म बढ़-चढ़ के हिस्सा लेंय, ताकि ओमन आधुनिक तकनीक ले जुड़ के अपन करियर ला नवा उड़ान दे सकें।
कुल मिला के देखब त “युवा फेस्ट-2026” सिरिफ एक ठन कार्यक्रम नई रहिस, बल्कि एहा युवा मन के हर तरफ ले विकास के एक बड़े माध्यम बनिस। ए आयोजन ह पढ़ाई-लिखाई, संस्कृति, खेल अउ तकनीक ला एक संग जोड़ के युवा मन मां आत्मविश्वास, नवा सोच अउ नेतृत्तव (लीडरशिप) के भाव जगाइस। कम समय अउ चुनौती के बाद घलो, बढ़िया टीम वर्क अउ मिहनत के सेती ए कार्यक्रम ह पूरी तरह ले सफल रहिस।
ए फेस्ट ह ए बात के बड़े परमान हे कि अगर युवा मन ला सही मंच, रस्ता अउ मौका मिलय, त ओमन अपन हुनर ले समाज अउ देस बनाय म बड़ योगदान दे सकथें। “युवा फेस्ट-2026” ह न केवल कलाकार अउ होनहार ला मंच दीस, बल्कि सीखे अउ आगू बढ़े के अइसन माहौल बनाइस, जेखर याद युवा मन के मन म जुग-जुग तक रही अउ ओमन ला अपन सपना पूरा करे बर बल देवत रही।
प्रतीक ताम्रकार ह अपन ए सफलता के जस अपन चाचाजी पवन कुमार ताम्रकार (प्राध्यापक, शासकीय महाविद्यालय कुरूद) ला दीस। ओखर मार्गदर्शन अउ प्रेरणा ले ही प्रतीक ह युवा फेस्ट मां हिस्सा लीस अउ ए मुकाम तक पहुंचिस। ओखर कहना हे कि युवा फेस्ट जइसन मंच लइका मन बर सीखे, आगू बढ़े अउ सपना ला सच करे के बढ़िया जरिया आय।
ए बात घलो बताय लायक हे कि युवा फेस्ट 2026 के भीतर जिला मां तकनीक, खेल, कला, नवाचार अउ उदिम (Startup) ले जुड़े कतको कार्यक्रम करे गिस। एखर असल उदेस्य युवा मन के हुनर ला मांजना अउ ओमन ला भविष्य बर तइयार करना आय। अइसन आयोजन ले न केवल कौशल विकास (Skill Development) ला बढ़ावा मिलत हे, बल्कि स्थानीय युवा मन ला देस अउ दुनिया के बड़े मौका मन ले जुड़े के रस्ता घलो मिलत हे।
