पुसगुड़ा म दिखीस सुशासन के असली तस्वीर, महुआ पेड़ के खाल्हे म लगिस जनचौपाल

गांव के विकास बर 20 लाख रुपिया के मंजूरी, सड़क निर्माण संग कतकोन बड़े फैसला

रायपुर .करीब 106 मनखे के आबादी वाले ए छोटे से गांव म कलेक्टर के जमीन म बइठ के गोठ-बात करना प्रसासन के .संवेदनसीलता के एक बड़े मिसाल बनिस। ‘नियद नेल्लानार योजना 2.0’, ‘बस्तर मुन्ने’ अउ ‘सुशासन तिहार’ के तहत लगाय जनचौपाल म गांव वाले ह खुलके अपन समस्या ल रखिन। कलेक्टर ह मौका म ही कतकोन समस्या के समाधान करिन अउ झटपट कार्रवाई के भरोसा दिलवाईन।

‘सुशासन तिहार’ के तहत प्रसासन के पहल अब दूर-दराज के जंगल इलाका म घलो असर दिखावत हे। सुकमा जिला के आखिरी छोर म बसे ग्राम पुसगुड़ा म कलेक्टर अमित कुमार ह महुआ पेड़ के छांव म गांव वाले के संग बइठ के जनचौपाल लगइन अउ ओ मन के पीरा ल सुनिन।

तुरत समाधान ले बढ़िस भरोसा

जनचौपाल के बखत खराब हैंडपंप के सिकायत मिलिस, जेला तुरत ठीक कराय गिस। एखर अलावा गांव म जरूरी सामुदायिक काम मन बर 20 लाख रुपिया के रासि मंजूर करे गिस, जेखर ले बुनियादी सुविधा के विस्तार होही। गांव वाले मन ह ए पहल के बड़ बखान करिन अउ एला सुशासन के असली तस्वीर बताइन।

गांव के विकास बर बड़े फैसला

जनचौपाल म गांव ल मुख्य रस्ता ले जोड़े बर पक्का सड़क बनाय के प्रस्ताव तुरत मंगाय गिस। महतारी ल मजबूत बनाय बर गांव ल ‘तूफान’ सवारी गाड़ी देय के घोषणा करे गिस। संग म ही, स्वास्थ्य विभाग के अधिकारी ल गरभवती महतारी के समय म पहचान अउ इलाज पक्का करे के निर्देश दिय गिस।

योजना ले बदलत हे गांव के सूरत

पुसगुड़ा के गांव वाले बताइन कि अब गांव म बिजली पहुँच गे हे अउ जल जीवन मिशन ले घर-घर नल म पानी मिलत हे। लेबर कार्ड (श्रम कार्ड) बनय ले ओ मन ल सरकारी योजना के फायदा घलो मिलत हे।

कलेक्टर ह कहिन कि प्रसासन के उद्देश्य सिरिफ आदेश जारी करना नोहे, बल्कि आखिरी मनखे तक पहुँच के ओखर समस्या के समाधान करना आय। ओ मन बताइन कि ए योजना के जरिया हर गांव तक बुनियादी सुविधा पहुँचाय के कोसिस करे जावत हे। ए मौका म एसडीएम सुभाष शुक्ला, जनपद सीईओ सुमित ध्रुव अउ एडिशनल एसपी मनोज तिर्की संग दूसर अधिकारी मौजूद रहिन।