राष्ट्रीय साधन सह-प्रावीण्य छात्रवृत्ति परीक्षा 2025-26 सम्पन्न

132 परीक्षा केन्द्र मा 28,570 परीक्षार्थी शामिल होइन

रायपुर. छत्तीसगढ़ माध्यमिक शिक्षा मण्डल, रायपुर कोति ले भारत सरकार के केंद्रीय शिक्षा मंत्रालय के अधीन स्कूल शिक्षा अउ साक्षरता विभाग के राष्ट्रीय साधन सह-प्रावीण्य छात्रवृत्ति योजना (NMMSE) 2025-26 के तहत तारीख 02 मई 2026 के राज्य मा परीक्षा के सफल अउ सुव्यवस्थित आयोजन करे गिस।

मण्डल के अध्यक्ष रेणु जी. पिल्ले के संरक्षण, सचिव पुष्पा साहू के निर्देश अउ उपसचिव डॉ. बी. रघु अउ मोनिका जयनशीने के मार्गदर्शन मा परीक्षा ह दू पाली मा आयोजित करे गिस। पहिली पाली मा बौद्धिक योग्यता परीक्षण (MAT) अउ दूसर पाली मा शैक्षिक योग्यता परीक्षण (SAT) सम्पन्न होइस।

परीक्षा नोडल अधिकारी डॉ. प्रदीप कुमार साहू ह जानकारी दिन कि ये परीक्षा बर छत्तीसगढ़ राज्य ला कुल 2246 छात्रवृत्ति के कोटा मिले हे। राज्य के 132 परीक्षा केन्द्र मा कुल 31,810 परीक्षार्थी मन के पंजीयन रिहिस, जेमा ले 28,570 परीक्षार्थी उपस्थित रहिन अउ 3,237 अनुपस्थित रहिन। परीक्षा के बखत नकल के एको मामला नइ आइस।

परीक्षा ला बने ढंग ले चलाय बर हर केन्द्र मा जिला शिक्षा अधिकारी कोति ले जरूरी व्यवस्था करे गे रिहिस। संगे-संग जिला प्रशासन कोति ले निरीक्षण दल अउ मण्डल कार्यालय कोति ले बनाय गे उड़नदस्ता टीम ह परीक्षा केन्द्र के अचानक निरीक्षण (चेकिंग) करिन। पूरा परीक्षा ह शांति अउ व्यवस्था के संग निपट गे।

छात्रवृत्ति योजना के जानकारी

राष्ट्रीय साधन सह-प्रावीण्य छात्रवृत्ति योजना के तहत राज्य सरकार कोति ले चलाय जात सरकारी, सरकारी अनुदान पाय अउ स्थानीय निकाय स्कूल मन के कक्षा 8वीं के ओ लइका मन पात्र हें, जेमन कक्षा 7वीं मा कम से कम 55% अंक (अनुसूचित जाति/जनजाति बर 5% के छूट) पाय हें अउ जेकर दाई-दादा/अभिभावक के बछर भर के आय 3.50 लाख रूपिया ले जादा नइ हे।

चुने गे विद्यार्थी मन ला भारत सरकार, शिक्षा मंत्रालय कोति ले कक्षा 9वीं ले 12वीं तक हर महीना ₹1000/- के छात्रवृत्ति दिये जाही।