सुशासन तिहार मा मिलिस उज्ज्वला गैस कनेक्शन, सिराय गे लकड़ी के चूल्हा के दुख-पीरा
रायपुर. सुशासन तिहार ह ग्राम धनरास के घरवाली माधुरी के जिनगी मा नवा अंजोर भर दे हे। बरसन ले लकड़ी के चूल्हा मा राँधे के मजबूरी सहत आवत माधुरी आज गजब खुश हे, काबर कि सिबिर (शिविर) मा प्रधानमंत्री उज्ज्वला योजना के तहत ओला मुफ्त मा गैस कनेक्शन, सिलेंडर अउ चूल्हा दे गे हे।
घाम, धूँआ अउ हर दिन लकड़ी बटोरय के चिंता माधुरी बर हमेसा ले एक बड़े परेशानी रिहिस। दू झन छोटे लइका अउ मजूरी करइया घरवाला के देख-रेख के बीच लकड़ी ले चूल्हा जलाना ओकर बर थका देवाय वाला काम बन गे रिहिस। गैस कनेक्शन बर ओ ह कतको बार पइसा जोरिस, फेर सबो रकम एक संग जमा नइ हो पाय के सेती ओ ह गैस नइ ले पावत रिहिस।
माधुरी ह बताइस कि ओकर गाँव धनरास मा सुशासन तिहार के तहत सिबिर लगे वाला हे। सिबिर मा गाँव वाले मन अपन अरजी (आवेदन) दे के सरकार के योजना के लाभ उठा सकथें। ओला ये जानकारी घलो मिलिस कि सिबिर मा आवेदन दे के प्रधानमंत्री उज्ज्वला योजना के लाभ आसानी ले मिल सकथे। ये बात ला जान के माधुरी ह तुरंते आवेदन दिस। जाँच-परख के बाद खाद्य विभाग कोति ले ओकर चुनाव करे गिस अउ ओला सिबिर मा गैस कनेक्शन दे बर बुलाय गिस।
सिबिर मा उद्योग, वाणिज्य अउ श्रम मंत्री लखनलाल देवांगन ह खुद माधुरी ला गैस कनेक्शन, सिलेंडर अउ चूल्हा भेंट करिन। गैस चूल्हा मिले के बाद माधुरी ह बताइस कि लकड़ी के चूल्हा जलाना ओकर बर भारी कठिन रिहिस अउ अब गैस मिले ले राँधना-पसना बहुत आसान हो गे हे। ओ ह कहिस कि—
“दू झन छोटे लइका अउ मजूरी करइया पति बर कभू घलो तुरते चूल्हा जला के खाना बनाना मुस्किल रिहिस, फेर अब सिरिफ़ लाइटर ऑन करे ले खाना-नास्ता झटकुन तैयार हो जाही।”
माधुरी ला ये गैस कनेक्शन पूरी तरह ले मुफ्त मा दे गे हे। संगे-संग 100 दिन के रोजगार पूरा करे मा ओला जॉब कार्ड घलो दे गे हे, जेकर ले ओकर आर्थिक सुरक्षा अउ मजबूत हो गे हे।
सिबिर मा धनरास गाँव के कलिता बाई (पति भरत लाल) अउ नंदिनी वैष्णव (पति अशोक कुमार) ला घलो प्रधानमंत्री उज्ज्वला योजना के तहत गैस कनेक्शन अउ चूल्हा दे गिस। दूनों महिला मन ह गैस मिले मा राहत जतावत कहिन कि सरकार के योजना ले ओमन ला असली फायदा मिलिस हे अउ सुशासन तिहार जइसन कार्यक्रम ह गाँव के हितग्राही बर बड़ लाभदायक साबित होत हे।
