सुशासन तिहार मा मुख्यमंत्री पहुँचिन चंदागढ़: बरगद के छाँव मा सजी जनचौपाल
रायपुर. सुशासन तिहार मा मुख्यमंत्री विष्णुदेव साय ह जशपुर जिला के दूरिहा वनांचल गाँव चंदागढ़ मा पहुँच के संवेदनशील अउ जनता कोति समर्पित सरकार के एक बड़का झलक देखाइन। मुख्यमंत्री के हेलीकॉप्टर जइसने चंदागढ़ मा उतरिस, गाँव वाले मन ह उत्साह अउ मया के संग ओकर भारी स्वागत करिन।
मुख्यमंत्री ह सीधा पत्थलगाँव विकासखण्ड के ग्राम भैंसामुड़ा पहुँचिन, जहाँ ओमन बजरंग बली मंदिर मा पूजा-पाठ करके प्रदेश के सुख, शांति अउ खुशहाली के कामना करिन। एखर बाद गाँव के बीच मा बरगद के एक विशाल पेड़ के सीतल छाँव मा जनचौपाल सजीस।
मुख्यमंत्री श्री साय ह कहिन कि— “सुशासन तिहार 1 मई ले 10 जून तक मनाय जात हे अउ एखर उदेस सरकार ला जनता के दुआर तक ले जाना हे, ताकि मनखे मन के समस्या के समाधान ओही जगा (मौका मा) करे जा सके।” मुख्यमंत्री ह कहिन कि आज ओ ह जनता के दुख-पीरा सुने बर आय हें अउ गाँव वाले मन के समस्या के तय समय मा निराकरण करे जाही।
ओमन गाँव के मनखे मन ले राशन, नून, सक्कर के उपलब्धता, पिये के पानी के बेवस्था, बिजली, पटवारी ले जुड़े समस्या अउ आन बुनियादी सुविधा के जानकारी लिन अउ अधिकारी ला तुरंते समाधान करे के निर्देश दिन।
जनचौपाल के बखत मुख्यमंत्री श्री साय ह ‘लखपति दीदी’ सुमिला कोरवा अउ पुष्पलता चौहान ले मयारू गोठ-बात करिन अउ ओमन के काम के बड़ाई करिन। ओमन जानिन कि महिला स्व-सहायता समूह के महिला मन ईंटा बनाना, किराना दुकान अउ बीसी सखी जइसन काम के माध्यम ले आत्मनिर्भर बनत हें।
मुख्यमंत्री ह बताइन कि प्रदेश मा अब तक 8 लाख लखपति दीदी बन चुके हें, जबकि प्रधानमंत्री नरेन्द्र मोदी के अगुवई मा पूरा देस मा ये संख्या 3 करोड़ ले जादा हो गे हे, जे ह महिला सशक्तिकरण कोति एक बड़े बदलाव आय।
मुख्यमंत्री श्री साय ह ग्राम चंदागढ़ अउ भैंसामुड़ा के विकास बर कतको जरूरी घोषणा करिन, जेमा सामुदायिक भवन निर्माण, मिनी स्टेडियम निर्माण, सीसी रोड निर्माण अउ लइका मन बर क्रिकेट किट अउ यूनिफॉर्म दे के बात शामिल हे। ओमन अधिकारी ला सामुदायिक भवन बर सही जगा चुने के निर्देश घलो दिन।
ये बखत मुख्यमंत्री श्री साय ह अलग-अलग जनकल्याणकारी योजना के जमीनी हाल के घलो जायजा लिन। कलावती चौहान ह बताइस कि गाँव मा महतारी वंदन योजना अउ प्रधानमंत्री आवास योजना के लाभ सबो पात्र हितग्राही ला मिलत हे, जेकर ऊपर मुख्यमंत्री ह संतोष जताइन।
मुख्यमंत्री श्री साय ह तेंदूपत्ता बटोरय के काम के जानकारी लिन अउ चरण पादुका योजना के लाभ के बारे मा घलो चर्चा करिन। ओमन बताइन कि राज्य मा श्री रामलला दर्शन योजना अउ मुख्यमंत्री तीर्थ दर्शन योजना के माध्यम ले आम जनता ला धार्मिक अउ सामाजिक रूप ले जोड़े जात हे। एखर संग ही ओमन कहिन कि ग्राम पंचायत मन मा बने ‘अटल डिजिटल सुविधा केंद्र’ के माध्यम ले अब आय, जाति, निवास प्रमाण पत्र समेत कतको सेवा एक ही जगा मा मिलत हे अउ गाँव वाले मन ला ऑनलाइन बैंकिंग अउ आन सुविधा के घलो लाभ मिलत हे।
मुख्यमंत्री ह जनचौपाल मा गाँव वाले के माँग अउ समस्या ला धियान ले सुनिन अउ अधिकारी ला साफ निर्देश दिन कि सबो समस्या मन ला प्राथमिकता के संग दूर करे जाय। ओमन कहिन कि सुशासन के असली मतलब एही आय कि सरकार के योजना ह आखिरी मनखे तक पहुँचय अउ मनखे मन ला ओकर लाभ समय मा मिलय।
ये मौका मा पत्थलगाँव विधायक गोमती साय, प्रमुख सचिव सुबोध कुमार सिंह, जनसंपर्क आयुक्त रजत बंसल, कलेक्टर रोहित व्यास, वरिष्ठ पुलिस अधीक्षक डॉ. लाल उमेद सिंह के संग बड़ संख्या मा गाँव के मनखे मन उपस्थित रहिन।
