बनत पंचायत भवन के निरीक्षण के बेरा में मजदूर मन दीन मुख्यमंत्री ल जेवन के नेवता: संग बइठ के खाइन बोरे बासी अउ आमा चटनी
- भोजन के साथ-साथ मुख्यमंत्री ह लेवत रहिन सरकारी योजना के फीडबैक
- भुइँया में जेवन, भुइँया में फैसला: पेयजल योजना ल जल्दी शुरू करे के निर्देश
- पहाड़ी इलाका में पानी के किल्लत देख के कहिन- “प्रोजेक्ट ल तुरंत मंजूरी दे के जमीन में काम शुरू कराव”
रायपुर . सुशासन तिहार के बेरा में आज कबीरधाम जिला के ग्राम लोखान में एक बड़ आत्मीय अउ संवेदनशील नजारा देखे बर मिलिस। मुख्यमंत्री विष्णुदेव साय ह बनत पंचायत भवन के अचानक निरीक्षण करे बर पहुँचीन अउ सीधा मजदूर मन के बीच पहुँच गे। मुख्यमंत्री के ए दौरा ह खाली काम-काज ल देखे तक सीमित नहीं रिहिस, बल्कि आम मनखे मन के साथ ओमन के जुड़ाव अउ सादगी के एक सुग्घर उदाहरण बन गे। मुख्यमंत्री ल अचानक अपन बीच पा के उहाँ काम करत मजदूर मन गदगद हो गे अउ सबो झन ओमन के आत्मीय स्वागत करिन।
निरीक्षण के बेरा में उहाँ काम करत महिला मजदूर ह मुख्यमंत्री ल बड़ मया अउ आग्रह के साथ मंझनिया के जेवन (भोजन) बर नेवता दीन। ए सादा नेवता ल मुख्यमंत्री ह तुरंत मान लीन अउ मुसकुरावत पूछिन कि— “जेवन में का-का लाए हव?” बहनी मन बताइन कि ओमन अपन घर ले छत्तीसगढ़ के पारंपरिक जेवन— बोरे बासी, पान पुरवा रोटी, चना भाजी, चरोटा भाजी, मुनगा बड़ी अउ आमा (आम) के चटनी लाए हें। ए बात ल सुन के मुख्यमंत्री ह बड़ सहजता के साथ ओमन करा बइठ के भोजन करे के फैसला कर लीन।
मुख्यमंत्री श्री साय ह मजदूर के बीच भुइँया में बइठ गे अउ ओमन के टिफिन ले ही जेवन ग्रहण करिन। बोरे बासी अउ आमा चटनी के सवाद लेवत ओमन कहिन कि— “ए जेवन ह हमर खुद के जीवन अउ संस्कृति ले जुड़े हावे।”
जेवन करत-करत मजदूर बहनी मन से गोठ-बात करके मुख्यमंत्री श्री साय ह सरकारी योजना के जमीनी हकीकत ल घलो समझे के कोसिस करिन। ओमन मजदूर महिला मन ले महतारी वंदन योजना, प्रधानमंत्री आवास योजना अउ दूसर जनकल्याणकारी योजना के फायदा के बारे में विस्तार ले जानकारी लीन। महिला मन घलो खुले मन ले अपन अनुभव बताइन, जेकर से मुख्यमंत्री ल योजना के असली स्थिति के सीधा फीडबैक मिलिस।
जब मुख्यमंत्री ह गांव के बड़े समस्या के बारे में पूछिन, त महिला मन बताइन कि पहाड़ी इलाका होय के सेती पिये के पानी (पेयजल) के समस्या हमेशा बने रहिथे। बोरवेल अउ हैंडपंप ह जादा दिन तक नहीं चल पाए, जेकर ले गरमी के दिन में पानी के किल्लत अउ बढ़ जाथे। ए समस्या ल मुख्यमंत्री ह गंभीरता ले लीन अउ तुरंत समाधान करे बर निर्देश दीन।
मुख्यमंत्री ह मउका में ही कलेक्टर ले पानी के व्यवस्था के बारे में पूछिन। कलेक्टर ह बताइस कि ए क्षेत्र के 26 गांव बर एक खास पेयजल योजना तैयार करे गे हे, जेकर तहत दूरिहा के पानी स्रोत ले पाइपलाइन के माध्यम ले पानी पहुँचाए के योजना हे। ए योजना ह तकनीकी रूप ले तैयार हे अउ एला जल्दी शुरू करे जा सकथे।
मुख्यमंत्री विष्णुदेव साय ह साफ सब्द में निर्देश देवत कहिन कि— “ए योजना ल जतका जल्दी हो सके मंजूरी दे के जमीन में काम शुरू कराए जाय, ताकि गांव वाले मन ल पानी के परेशानी ले राहत मिल सके।” ओमन कहिन कि सुशासन के असली मतलब यही आय कि सरकार के योजना ह समय में अउ सही ढंग ले जनता तक पहुँचे। मुख्यमंत्री ह साफ करिन कि हमर सुशासन सरकार ह मनखे मन के समस्या ल दूर करे बर पूरा ईमानदारी ले काम करत हे।
