सुशासन तिहार ले मिलत हे मुस्कान, सरकार रखत हे जरूरतमंद के धियान
राजनांदगांव के पुष्पकला ला मिलिस मुफत ईलाज
रायपुर. सुशासन तिहार मनखे मन के जिनगी मं मुस्कान अउ राहत लेके आई हे। सरकार के योजना के सही ढंग ले चले ले ओकर प्रतिबद्धता दिखत हे अउ जनता के समस्या के बढ़िया निराकरण करे जावत हे। उहें आम जनता मं घलो अपन समस्या मन के समाधान बर जागरूकता आई हे।
ए कड़ी मं आज राजनांदगांव सहर के शंकरपुर स्कूल मं वार्ड नंबर 7, 9 अउ 10 बर आयोजित जनसमस्या निवारण शिविर मं पहुंचे पुष्पकला मेश्राम ह मुफत ईलाज मिले ले खुसी जताइस। ओहा बताइस कि सुगर अउ ब्लड प्रेशर के समस्या होय के सेती ओहा अपन ईलाज कराना चाहत रहिस, फेर डॉक्टर तीर नइ जा पावत रहिस। आज शिविर मं मोबाईल मेडिकल यूनिट मं ओकर सुगर अउ ब्लड प्रेशर के जांच करे गिस। डॉक्टर ह स्वास्थ्य ला देखत हुए जरूरी सावधानी अउ सलाह दीन अउ समे मं दवाई खाय बर कहिन।
पुष्पकला मेश्राम ह सरकार ला स्वास्थ्य सुभीता बर धन्यवाद दीस। ओहा कहिस कि सरकार ह गरीब अउ जरूरतमंद के धियान रखत हे। अइसने शिविर मं मुफत ईलाज मिले ले बड़े सुभीता होत हे। शिविर ले आम जनता ला बहुत लाभ मिलत हे अउ सरकार के योजना के जानकारी घलो मिलत हे। आयुष्मान कार्ड, सामाजिक सुरक्षा पेंशन अउ आन योजना ले नागरिक मन लाभ उठावत हें।
