मदर्स डे मं सौगात : रायपुर महिला जेल मं वीडियो कॉलिंग सिस्टम के सुरूआत
बंदिनी ला मिलिस अपन ले जुड़े के रस्ता
रायपुर, आज मदर्स डे के ममता भरे मौका मं रायपुर के महिला जेल मं बंदिनी बर खुसी के एक नवा किरन जागे हे। प्रदेश के उपमुख्यमंत्री विजय शर्मा के घोषणा के मुताबिक, जेल प्रशासन ह महिला बंदिनी ला ‘प्रिजन इनमेट वीडियो कॉलिंग सिस्टम’ के बहुप्रतीक्षित तोहफा दीस हे।
अपन ले दूरी होही कम
वीडियो कॉलिंग के सुभीता बर जेल विभाग अउ बीएसएनएल (BSNL) के बीच होय अनुबंध के तहत ए सिस्टम ला लगाए गे हे। अब महिला बंदी मन अपन परिवार अउ वकील ले सीधे वीडियो कॉल के माध्यम ले गोठ-बात कर सकही, जेखर से ओमन ला मानसिक सहारा अउ कानूनी सलाह मं मदद मिलही।
हुनर ला मिलिस सम्मान
‘निश्चय कार्यक्रम’ के तहत कौशल विकास के ट्रेनिंग पूरा करइया 38 महिला बंदिनी ला प्रमाण-पत्र देके सम्मानित करे गिस। एहा ओमन के पुनर्वास अउ भविष्य मं आत्मनिर्भर बने के डाहर मं एक बड़े कदम आय।
जेल मं अपन महतारी के संग रहत 14 मासूम लइका मन ला विभाग डाहर ले खास उपहार बांटे गिस, जेखर से लइका मन के चेहरा मं खुसी छा गे अउ जेल के माहौल ह उत्सई बन गे। ए संवेदनसील पहल के सुरूआत मं जेल अउ प्रशासन के बड़े अधिकारी उपस्थित रहिन, जेमं मुख्य रूप ले हिमांशु गुप्ता (डीजी, जेल), योगेश सिंह क्षत्री (जेल अधीक्षक), विजय छबलानी (प्रतिनिधि, BSNL), गरिमा पांडेय (प्रभारी, महिला जेल) अउ सबो जेल स्टाफ संग संबंधित महिला बंदी सामिल रहिन। ए पहल ह न केवल बंदिनी ला ओमन के मानवाधिकार अउ परिवार ले जोड़े के माध्यम बनही, बल्कि जेल सुधार के डाहर मं तकनीक के उपयोग के एक बढ़िया उदाहरण घलो पेश करही।
