निश्चय कार्यक्रम: रायपुर जेल के 67 बंदी ला मिलिस कौशल प्रमाण-पत्र

मुख्यधारा मं लउटे के नवा पहल

रायपुर, छत्तीसगढ़ सरकार के महत्वाकांक्षी योजना ‘निश्चय’ के तहत आज केंद्रीय जेल अउ महिला जेल, रायपुर मं एक खास कार्यक्रम के आयोजन करे गिस। ए कार्यक्रम के मुख्य उद्देश्य युवा बंदी ला अपराध के दुनिया ले दूर करके आत्मनिर्भर अउ सम्मानजनक जिनगी डाहर ले जाना हे। ‘जेन जी’ (Gen Z) युवा बंदी ला अपराध के दलदल मं वापिस जाय ले रोके बर छत्तीसगढ़ के सबो जेल मं ‘निश्चय’ कार्यक्रम चलाय जावत हे। ए कार्यक्रम मं युवा बंदी ला काउंसलिंग, अपराध बोध के ज्ञान, स्वरोजगार बर कौशल प्रशिक्षण अउ जेल ले छूटे के बाद अपन काम सुरू करे बर बैंक के माध्यम ले लोन (करजा) घलो दियाय जाथे।

कौशल विकास ले आत्मनिर्भरता डाहर

समारोह के बखत कुल 67 बंदी मन ला ओमन के ट्रेनिंग पूरा होय ले कौशल विकास प्रमाण-पत्र बांटे गिस। एमां 38 महिला बंदी अउ 29 पुरुष बंदी सामिल हें। उपमुख्यमंत्री विजय शर्मा के मार्गदर्शन अउ मुख्यमंत्री के सचिव राहुल भगत के सहयोग ले चलत ए अभियान मं बंदी ला मनोवैज्ञानिक काउंसलिंग अउ रोजगार ले जुड़े प्रशिक्षण दिये जावत हे।

तकनीकी शिक्षा बर कंप्यूटर केंद्र के सुरूआत

डिजिटल साक्षरता ला बढ़ावा दे बर केंद्रीय जेल, रायपुर मं आज कंप्यूटर प्रशिक्षण केंद्र के विधिवत सुरूआत करे गिस। अब बंदी जेल के भीतर ही कंप्यूटर के बुनियादी अउ उन्नत जानकारी पा सकही, जेखर ले जेल ले छूटे के बाद ओमन ला काम मिले मं आसानी होही।

स्वरोजगार बर लोन मेला अउ मदद

बंदी ला सिरिफ ट्रेनिंग तक सीमित नइ रख के, ओमन ला आर्थिक रूप ले मजबूत बनाय के तैयारी घलो पूरा कर ले गे हे। 13 मई 2026 के इंडियन ओवरसीज बैंक डाहर ले केंद्रीय जेल परिसर मं ‘लोन मेला’ लगाय जाही। एकर उद्देश्य जेल ले रिहा होय वाले बंदी ला खुद के बियापार सुरू करे बर आसानी ले लोन दिलाना हे।

ए मौका मं डीजी (जेल) हिमांशु गुप्ता, जेल अधीक्षक योगेश सिंह क्षत्री, महिला जेल प्रभारी गरिमा पांडेय संग जेल प्रशासन के सबो अधिकारी अउ करमचारी उपस्थित रहिन।