मंदिर सिरिफ आस्था के केंद्र नइ हे, बल्कि समाज ला जोड़े अउ संस्कृति-परंपरा ला जीवंत रखे के सशक्त माध्यम आय: मुख्यमंत्री विष्णुदेव साय
- कलिबेश्वर महादेव मंदिर के प्राण प्रतिष्ठा समारोह मं सामिल होइन मुख्यमंत्री विष्णुदेव साय
- कलिबा मं सामुदायिक भवन अउ हनुमान टेकरी मं सूर्य नमस्कार प्रतिकृति निर्माण के घोषणा
- कलिबेश्वर महादेव मंदिर प्राण प्रतिष्ठा कार्यक्रम मं उमड़िस सरधा अउ आस्था के सैलाब
रायपुर. मुख्यमंत्री विष्णुदेव साय आज अपन जशपुर प्रवास के बखत विकासखंड कुनकुरी के ग्राम कलिबा मं नवनिर्मित कलिबेश्वर महादेव मंदिर के प्राण-प्रतिष्ठा कार्यक्रम मं सामिल होइन। ए मौका मं ओकर धरमपत्नी कौशल्या साय घलो उपस्थित रहिन।
मुख्यमंत्री विष्णुदेव साय ह यज्ञमंडप मं हरिनाम संकीर्तन करत हुए परिक्रमा करिन अउ यज्ञशाला मं विधिवत पूजा-आरती करके प्रदेश के मनखे मन के सुख-समृद्धि, खुसहाली अउ मंगलमय जिनगी के कामना करिन। ओमन मंदिर निर्माण ला क्षेत्र के आस्था, सांस्कृतिक चेतना अउ सामाजिक एकजुटता ले जुड़े महत्वपूर्ण काम बतावत सबो श्रद्धालु ला सुभकामना दीन।
मुख्यमंत्री विष्णुदेव साय ह कहिन कि हमर सनातन संस्कृति ह सेवा, सद्भाव, सामाजिक समरसता अउ भाईचारा के संदेस देथे। मंदिर सिरिफ आस्था के केंद्र नइ होवय, बल्कि समाज ला जोड़े अउ संस्कृति अउ परंपरा ला जीवंत रखे के सशक्त माध्यम घलो आय। अइसने धार्मिक आयोजन समाज मं सकारात्मक ऊर्जा भरथे अउ मनखे मन ला एक-दूसरे ले जोड़े के काम करथे।
मुख्यमंत्री श्री साय ह ग्रामवासी ला नवनिर्मित मंदिर बर बधाई अउ सुभकामना देवत ग्राम कलिबा मं सामुदायिक भवन निर्माण बर 25 लाख रुपय के घोषणा करिन। संग ही हनुमान टेकरी मं सामुदायिक भवन अउ सूर्य नमस्कार के मुद्रा के प्रतिकृति निर्माण के घोषणा घलो करिन।
ए मौका मं मुख्यमंत्री श्री साय ह अपन कार्यकाल के प्रमुख उपलब्धि के गोठ करत कहिन कि राज्य सरकार ह प्रधानमंत्री नरेंद्र मोदी के जादातर गारंटी ला तेजी ले लागू करे हे। ओमन बताइन कि महिला मन ला आर्थिक रूप ले मजबूत बनाय बर चलत ‘महतारी वंदन योजना’ के तहत अब तक 27वीं किस्त के रूप मं महिला मन के खाता मं 17 हजार 500 करोड़ रुपय ले जादा के राशि जमा करे जा चुके हे।
मुख्यमंत्री श्री साय ह कहिन कि छत्तीसगढ़ ह भगवान श्री राम के ननिहाल आय अउ राज्य सरकार ह ‘रामलला दर्शन योजना’ के तहत अब तक 42 हजार ले जादा श्रद्धालु ला भगवान श्री राम के दर्शन करा चुके हे। एकर संग ही मुख्यमंत्री तीर्थ दर्शन योजना के माध्यम ले देशभर के 19 प्रमुख तीर्थ स्थल के जात्रा घलो कराय जावत हे।
मुख्यमंत्री श्री साय ह कहिन कि आम जनता के समस्या के तुरंते समाधान बर प्रदेशभर मं ‘सुशासन तिहार’ के आयोजन करे जावत हे। संग ही राजस्व मामला के निराकरण बर खास राजस्व शिविर घलो लगाय गे हें। ओमन मनखे मन ले ए शिविर के जादा ले जादा लाभ उठाए के अपील करिन। ओमन कहिन कि जल्दी ही मुख्यमंत्री हेल्पलाइन सुरू करे जाही, जेखर बर एक टोल फ्री नंबर जारी करे जाही। ए माध्यम ले नागरिक अपन समस्या दर्ज करा सकही अउ तय समे मं ओकर समाधान के व्यवस्था करे जाही। समे मं समाधान नइ होय ले संबंधित अधिकारी ऊपर कार्यवाही घलो करे जाही।
मुख्यमंत्री श्री साय ह कहिन कि बिजली बिल भुगतान समाधान योजना के तहत प्रदेशभर मं शिविर लगाके मनखे मन के समस्या के निराकरण करे जाही अउ 757 करोड़ रुपय के बिजली बिल माफ करे जावत हें। ओमन मनखे मन ले योजना के लाभ ले बर पंजीयन कराए के अपील करिन।
मुख्यमंत्री श्री साय ह कहिन कि हाल ही मं प्रदेश के नवा बने 515 प्राथमिक कृषि साख सहकारी समिति (PACS) के वर्चुअल सुरूआत करे गे हे। एकर संग ही प्रदेश मं सहकारी समिति के संख्या बढ़के 2 हजार 573 हो गे हे। अब पैक्स समिति बहुउद्देश्यीय सोसायटी के रूप मं काम करहीं, जेखर ले किसान मन ला खाद, बीज अउ अल्पकालीन करजा (ऋण) जइसन सुभीता गांव के तीर मं ही मिल सकही अउ धान खरीदी के तरीका घलो अउ सरल अउ सुभीता जनक बनही।
ए मौका मं पद्मश्री जागेश्वर यादव, छत्तीसगढ़ माटी कला बोर्ड के अध्यक्ष शंभूनाथ चक्रवर्ती, जिला पंचायत अध्यक्ष सालिक साय, मंदिर समिति अध्यक्ष उपेंद्र यादव, जनपद अध्यक्ष सुशीला साय, पूर्व संसदीय सचिव भरत साय, जनप्रतिनिधि, अधिकारी-करमचारी अउ बड़े संख्या मं श्रद्धालु उपस्थित रहिन।
