सुशासन के जमीनी तस्वीर: सिलफिली बजार म मंत्री लक्ष्मी राजवाड़े के औचक भ्रमण, आम मनखे मन ले सीधा गोठ-बात
रायपुर. प्रदेश मं सुशासन ला सही मायने मं लागू करे बर सरकार के कोशिश अब जमीनी स्तर मं साफ दिखे बर धर ले हें। एही कड़ी मं महिला अउ बाल विकास मंत्री लक्ष्मी राजवाड़े ह आज बिहनिया सूरजपुर जिला के भटगांव विधानसभा क्षेत्र के सिलफिली बजार के औचक दौरा करिन अउ आम जनता ले सीधा गोठ-बात करिन।
मंत्री श्रीमती राजवाड़े ह सब्जी मंडी अउ बजार क्षेत्र के अलग-अलग दुकान मं पैदल घूमके बियापारी , गांव वाले अउ महिला मन ले आत्मीय गोठ-बात करिन। ओमन बिना कोनो ताम-झाम (औपचारिकता) के मनखे मन के बीच पहुँच के ओमन के हाल-चाल जानिन अउ रोज के जिनगी ले जुड़े समस्या ला धियान ले सुनिन। ए बखत कतको नागरिक ह स्थानीय सुभीता, बजार के व्यवस्था अउ आन जरूरत ले जुड़े मुद्दा मन ला साझा करिन।
मंत्री श्रीमती राजवाड़े ह मौका मं ही संबंधित अधिकारी ला जरूरी निर्देश देवत समस्या के जल्दी अउ बढ़िया निराकरण करे बर कहिन। ओमन साफ कहिन कि आम मनखे मन के समस्या के समाधान ला प्राथमिकता के आधार मं तय करे जाय अउ एमां कोनो भी किसम के लापरवाही बरदास नइ करे जाय।
भ्रमण के बखत मंत्री श्रीमती राजवाड़े ह नागरिक ला सरकार के अलग-अलग जनकल्याणकारी योजना के जानकारी घलो दीन। ओमन खास तौर ले महिला, लइका अउ जरूरतमंद मन बर चलत योजना के गोठ करिन अउ पात्र हितग्राही ले ओकर जादा ले जादा लाभ उठाए के अपील करिन।
