हिंदी पत्रकारिता के 200 बछर पूरा होय म आयोजित होही “पत्रकारिता मार्तण्ड उत्सव”
मुख्यमंत्री विष्णुदेव साय ह करिन उत्सव पोस्टर के विमोचन, सफल आयोजन बर दीन सुभकामना
रायपुर, मुख्यमंत्री विष्णुदेव साय ले आज ओकर निवास कार्यालय म रायपुर प्रेस क्लब के प्रतिनिधिमंडल ह सोजन्य मुलाकात करिन। प्रतिनिधिमंडल ह मुख्यमंत्री विष्णुदेव साय ला हिंदी पत्रकारिता के 200 बछर पूरा होय के खुसी म आवे वाला 30 मई के आयोजित “पत्रकारिता मार्तण्ड उत्सव” म सामिल होय बर नेवता दीन।
मुख्यमंत्री श्री साय ह नेवता बर प्रतिनिधिमंडल के आभार जताइन अउ आयोजन के सफलता बर सुभकामना दीन। ए मौका म मुख्यमंत्री ह “पत्रकारिता मार्तण्ड उत्सव” के पोस्टर के विमोचन घलो करिन।
प्रेस क्लब के अध्यक्ष मोहन तिवारी ह बताइन कि ये आयोजन हिंदी पत्रकारिता के गौरवसाली परंपरा, लोकतंत्र म मीडिया के जरूरी भूमिका अउ पत्रकारिता के योगदान ला सम्मानित अउ सुरता (यादगार) बनाए के उदेस्य ले करे जावत हे। ओमन जानकारी दीन कि कार्यक्रम म परदेस अउ देस के बड़े पत्रकार, संपादक, मीडिया बिसेसज्ञ, साहित्यकार अउ समाज के अलग-अलग छेत्र के नामी मनखे मन सामिल होहीं। आयोजन म पत्रकार सम्मान, विचार गोष्ठी, बिसेस व्याख्यान अउ सांस्कृतिक कार्यक्रम के आयोजन घलो करे जाही।
ए मौका म मुख्यमंत्री के सलाहकार आर. कृष्णा दास, प्रेस क्लब के महासचिव गौरव शर्मा संग आन पदाधिकारी उपस्थित रहिन।
