“नर्सिंग सिस्टर” अब कहाही “सीनियर नर्सिंग ऑफिसर” अउ “स्टाफ नर्स” बनिन “नर्सिंग ऑफिसर”
स्वास्थ्य मंत्री श्याम बिहारी जायसवाल ह अंतर्राष्ट्रीय नर्सेस दिवस मा करीन बड़े घोषणा
रायपुर. स्वास्थ्य मंत्री श्याम बिहारी जायसवाल ह अंतर्राष्ट्रीय नर्सेस दिवस के मउका मा राज्य के नर्स बर एक गौरव भरे घोषणा करे हें। अब ले राज्य मा नर्सिंग संवर्ग के पदनाम (नाम) ला बदल दे गे हवय। नवा घोषणा के मुताबिक:
- नर्सिंग सिस्टर ला अब “सीनियर नर्सिंग ऑफिसर” कहे जाही।
- स्टाफ नर्स के नवा नाम “नर्सिंग ऑफिसर” होही।
अम्बेडकर अस्पताल मा होइस कार्यक्रम रायपुर के डॉ. भीमराव अम्बेडकर स्मृति चिकित्सालय मा आयोजित खास कार्यक्रम मा स्वास्थ्य मंत्री ह ए बात कहीन। ए मउका मा भारी संख्या मा नर्सिंग अधिकारी, छात्र-छात्रा अउ अस्पताल के कर्मचारी मौजूद रिहिन।
नर्स के सेवा ला बताइन “महतारी” बरोबर मंत्री श्री जायसवाल ह नर्स के तारीफ करत कहीन कि— “मरीज मन के सेवा मा नर्स मन के भूमिका सबले बढ़ के हवय। ओमन स्वास्थ्य व्यवस्था के रीढ़ हंवय।” ओमन कोरोना काल के बखत नर्स के मेहनत ला सुरता करीन अउ कहीन कि चिकित्सा सेवा मा नर्स के दर्जा महतारी (माँ) के बरोबर हवय, काबर कि ओमन परिवार जइसन मरीज के देखभाल करथें।
मुख्यमंत्री के मानिन आभार स्वास्थ्य मंत्री ह मुख्यमंत्री विष्णु देव साय के आभार मानत कहीन कि राज्य सरकार स्वास्थ्य सुविधा ला मजबूत करे बर लगातार काम करत हवय। बरसों ले रुके काम ला अब पूरा करे जात हे।
कार्यक्रम के आखिर मा मंत्री ह सीनियर नर्सिंग ऑफिसर डॉ. रीना राजपूत, नीलिमा शर्मा, रंजना सिंह ठाकुर, सुमन देवांगन, कोमेश्वरी नवरंगे, प्रगति सतपुते, शीतल सोनी अउ नमिता डेनियल समेत जम्मो नर्सिंग ऑफिसर ला बधाई दीस अउ ओमन के काम के सराहना करीस।
