प्रधानमंत्री आवास बनाय के काम म तेजी लाय बर लगीस जनचौपाल
रायपुर. प्रधानमंत्री आवास योजना के तहत मंजूर होय घर के निर्माण ला समय म पूरा कराय बर बलरामपुर-रामानुजगंज जिला प्रशासन ह अब कड़ाई सुरु कर दे हे। ए कड़ी म ग्राम पंचायत बदौली म जिला पंचायत सीईओ के मौजूदगी म एक बिसेस जनचौपाल अऊ समीक्षा बैठक रखे गिस। ए बैठक म बदौली, कुन्दीकला अऊ शिवपुर के प्रधानमंत्री आवास योजना के हितग्राही भारी संख्या म पहुँचीन।
बैठक म हितग्राही ले सीधा गोठ-बात करके ओमन के घर बनाय के काम कहाँ तक पहुँचे हे, एकर जानकारी लीन। जउन घर के काम अभी तक सुरु नी होय हे, ओला तुरंत सुरु करे के निरदेस दीन। जउन घर के काम कुर्सी (प्लिंथ) ले ऊपर तक पहुँच गे हे, ओला आघू के 15 दिन के भीतर पूरा करे बर कहिन। एकर अलावा, ढलाई के काम ला घलो 10 दिन के भीतर अनिवार्य रूप ले कराय के निरदेस दिय गिस।
बैठक म अधिकारी ला कहिन कि हितग्राही ला बखत म तकनीकी सलाह अऊ जरूरी मदद दिय जाय, ताकि घर बनाय म कोनो बाधा झन आय। समीक्षा बैठक म ग्राम पंचायत सिधमा अऊ खोखनिया के सचिव के अनुपस्थिति ला देखत हुए, दूनों सचिव के खिलाफ ‘कारण बताओ नोटिस’ जारी करे के निरदेस दिय गिस।
जनचौपाल म विकासखंड स्तर के अधिकारी ला ए घलो निरदेस दीन कि जमीन के बिवाद, पलायन या आरआरसी (RRC) ले जुड़े रुके हुए मामला के कागज, ग्राम सभा के प्रस्ताव के संग एक हफ्ता के भीतर जमा करे जाय, ताकि समस्या ला सुलझा के घर बनाय के काम म तेजी लाय जा सके।
