घना जंगल अउ नदी-नरवा ला पार करके स्वास्थ्य दूत बचाईन दू मासूम मन के जान
- मुख्यमंत्री स्वस्थ बस्तर अभियान बनीस जीवन रक्षक, माड़वी नन्दे अउ सुमड़ी ला मिलीस नवा जिंदगी
- अभियान के तहत 1,74,770 मनखे मन के स्वास्थ्य जांच अउ इलाज पूरा
रायपुर, सुकमा जिला के अइसन दुरिहा इलाका जहाँ के भूगोल घलो डहर-डहर मा परीक्षा लेथे, उहाँ सुकमा जिला प्रशासन अउ स्वास्थ्य विभाग के टीम ह अपन कर्तव्य के एक मिसाल पेश करे हें। ‘मुख्यमंत्री स्वस्थ बस्तर अभियान’ के तहत दुरिहा अउ पहुँच ले बाहिर ग्राम ‘दुरभा’ पहुँचे टीम ह दू मासूम लइका मन—5 बछर के माड़वी नन्दे अउ 4 बछर के माड़वी सुमड़ी ला नवा जिंदगी दीस। मलेरिया, भारी कुपोषण अउ देह मा सिरिफ 2 ले 3 ग्राम हीमोग्लोबिन के संग कमजोर हो चुके ए लइका मन बर प्रशासन के ये सक्रियता कोनो वरदान ले कम साबित नई होईस।
कलेक्टर अमित कुमार के मार्गदर्शन मा मुख्यमंत्री विष्णुदेव साय के ‘स्वस्थ बस्तर’ के संकल्प ला भुइँया मा उतारत स्वास्थ्य कर्मी ह गजब साहस देखाइन। घना जंगल, नदी अउ नरवा ला पार करके जब टीम दुरभा पहुँचीस, त लइका मन के हालत देख के ओ मन ला तुरंते अस्पताल पहुँचाए के फैसला लीस। कठिन डहर मा कतको मील के सफर पैदल तय करके लइका मन ला प्राथमिक स्वास्थ्य केंद्र लाए गीस, जहाँ ले एम्बुलेंस के माध्यम ले लगभग 96 किलोमीटर दुरिहा जिला अस्पताल सुकमा पहुँचाए गीस। प्रशासन के ये संवेदनशीलता ह बता दीस कि सरकार के नजर बस्तर के आखिरी छोर मा बइठे मनखे ऊपर घलो हे।
जिला अस्पताल के विशेषज्ञ डॉक्टर ह जुध स्तर मा लइका मन के इलाज सुरु करिन। एनीमिया अउ मलेरिया ले जूझत ए लइका मन ला न केवल खून चढ़ाए गीस, बल्कि मलेरिया के पूरा कोर्स अउ नीक जतन ले इलाज कराय गीस। पोषण पुनर्वास केंद्र (NRC) मा होय ए मुफ्त इलाज के नतीजा बहुत सुखद रहीस। कुछे दिन मा लइका मन के हीमोग्लोबिन 9 ग्राम ले पार हो गीस अउ ओ मन के मुरझाय चेहरा मा हाँसी लहुट आईस। ए बीच लइका मन के घर वाला ला घलो पोषण, साफ-सफाई अउ लइका मन के मानसिक विकास बर सलाह दिय गीस ताकि आगू चल के अइसन परेशानी झन आय।
इलाज के बाद लइका मन ला सुरक्षित ओ मन के गाँव तक पहुँचाए गीस। कलेक्टर अमित कुमार के मुताबिक, ये मिशन सिरिफ इलाज तक नई रहीस, बल्कि लइका मन ला सरकार के आन योजना ले जोड़े बर जरूरी कागजात (दस्तावेज) घलो तैयार कराय गे हें। आज दुरभा गाँव मा लहुट आए ए मासूम के खिलखिलाहट स्वास्थ्य विभाग के ओ सफल मिहनत के गूँज आय, जे ह पहाड़ अउ घना जंगल ला लांघ के मनखे-मनखे तक पहुँचत हे।
मुख्यमंत्री स्वस्थ बस्तर अभियान के तहत सुकमा जिला मा कुल 2,93,386 मनखे मन के स्वास्थ्य जांच के लक्ष्य रखे गे हे, जेमा ले आज के तारीख तक 1,74,770 मनखे मन के जांच अउ इलाज हो चुके हे। अभियान के बखत लगभग 5,240 मरीज ला मोतियाबिंद, मलेरिया, कुष्ठ, टीबी, खून के कमी, जोखिम वाली गर्भवती महिला, कुपोषित लइका, बीपी अउ शुगर जइसन बीमारी के आधार मा पहिचाने गीस अउ ओ मन ला बढ़िया इलाज बर अस्पताल रेफर करे गीस।
