‘सड़क खंड के पूरा विकास के कार्ययोजना बनाके करव काम, आगू के जरूरत के हिसाब से एक संग मंजूर कराव फ्लाई-ओवर्स’

लोक निर्माण विभाग के सचिव ह बनत हुए काम के जाच-परख करके काम के बढ़ाव के समीक्षा करिन

रायपुर, लोक निर्माण विभाग के सचिव मुकेश कुमार बंसल ह आज संभागीय मुख्यालय दुर्ग म लोक निर्माण विभाग के दुर्ग इलाका के मुख्य अभियंता, अधीक्षण अभियंता अउ कार्यपालन अभियंता के बइठक लीन। ओमन बइठक म भवन, सड़क अउ पुल के निर्माण के बढ़ाव के समीक्षा करिन। एकर संग च ओमन दुर्ग अउ पाटन म तीन ठन काम के जगह म जाके काम के निरीक्षण घलो करिन।

श्री बंसल ह बइठक म अधिकारी ल आगू के जरूरत मन के हिसाब से जम्मो सड़क खंड म फ्लाई-ओवर्स के पूरा योजना के संग काम करे के सुझौ (निर्देश) दीं। ओमन दुर्ग इलाका के लोक निर्माण विभाग के जम्मो संभाग म चलत हुए काम मन म तेजी लावत हुए तय समय म काम पूरा करे बर कहिन। लोक निर्माण विभाग के प्रमुख अभियंता वी.के. भतपहरी घलो ए बइठक म हाजिर रहिन।

काम म गुणवत्ता अउ जवाबदेही ऊपर जोर

लोक निर्माण विभाग के सचिव ह टेंडर (निविदा) प्रक्रिया पूरा होय के 15 दिन के भीतर चुने गे एजेंसी ले अनुबंध के काम पूरा करे के निर्देश दीं। ओमन कहिन कि गुणवत्ता अउ समय म काम पूरा करना सरकार के सबले पहिली प्राथमिकता आय। विभागीय अधिकारी अपन सुघर अउ समयबद्ध काम ले मनखे मन अउ जनप्रतिनिधि के बीच म विभाग के एक नीक पहिचान बनावंय। जम्मो काम ल पूरा जवाबदेही, सक्रियता अउ गंभीरता के संग पूरा करव।

सचिव श्री बंसल ह जम्मो अधिकारी ल मुख्यालय म रहके बनत हुए काम के पुख्ता अउ नियमित देख-रेख करे के निर्देश दीं। ओमन अधिकारी ल अपन इलाका के सड़क के हाल-चाल के पूरा जानकारी रखे बर कहिन अउ परफार्मेंस गारंटी वाली सड़क म सुधार के जरूरत होय म संबंधित ठेकेदार ले तुरंते मरम्मत करवाय बर कहिन। ओमन भुइँया स्तर म जमीन-अधिग्रहण म आवत अड़चन मन ले बड़े आफिस ल बताय बर कहिन, ताकि ओकर निपटारा बड़े स्तर म समय म करे जा सके। ओमन ए काम म कोनो घलो किसम के देरी नहीं करे बर कहिन।

नवा तकनीक अउ वर्टिकल निर्माण ल बढ़ावा

लोक निर्माण विभाग के सचिव ह सरकारी भवन के निर्माण बर जमीन के उपलब्धता अउ उपयोगिता के हिसाब से हॉरिजांटल (पसरे हुए) के जगह वर्टिकल निर्माण ल बढ़ावा देवत हुए आधुनिक डिजाइन अउ नवा तकनीक मन ले निर्माण के कार्ययोजना बनाये ऊपर जोर दीं। ओमन भवन के निर्माण के बखत सामान ले लेके टाइल्स, पुट्टी अउ पेंट घलो बढ़िया क्वालिटी के लगाय बर कहिन। ओमन भुइँया के पानी स्तर ल खंचाय (रिचार्ज करे) बर जम्मो भवन म रेन वॉटर हार्वेस्टिंग (पानी बचाव) के घलो ब्यवस्था करे के निर्देश दीं।

काम के जगह म जाके देखिन प्रगति

लोक निर्माण विभाग के सचिव मुकेश कुमार बंसल ह दुर्ग के साइंस कॉलेज म बनत 750 सीटर आडिटोरियम के काम के बारीकी ले जांच-परख करिन। ओमन काम म तेजी लावत हुए जल्दी एकर निर्माण पूरा करे के निर्देश दीं। ओमन जेल तिराहा ले मिनीमाता चौक पुलगांव तक के सड़क चौड़ीकरण के काम के घलो मुआयना करिन अउ अधिकारी ल जरूरी निर्देश दीं।

लोक निर्माण विभाग के सचिव ह पाटन सरकारी कॉलेज के बनत हुए भवन के काम के घलो निरीक्षण करिन। ओमन इहां नवा भवन म क्लास-रुम, लैब, टायलेट (शौचालय) इत्यादि ल देखिन। ओमन विभागीय अधिकारी ल कॉलेज प्रबंधन ले मिलके लइका मन के जरूरत अउ उपयोगिता के हिसाब से जम्मो काम ल पूरा करे के निर्देश दीं। ओमन पूरे कॉलेज परिसर ल हरियर, सुघर अउ सुव्यवस्थित करे बर कहिन।