मनरेगा ले बदलिस खेती के सुरत : खैराडीह म पक्की सिंचई नाली बनिस किसान मन के जीवनरेखा
800 मीटर लांभी नाली ले 250 एकड़ भुइयां तक पहुचिस सिंचई के पानी, किसान मन के कमाई म होइस बढ़ाव
रायपुर. महात्मा गांधी राष्ट्रीय ग्रामीण रोजगार गारंटी योजना (मनरेगा) के तहत गांव-गंवाई के इलाका मन म पानी बचाव अउ सिंचई सुबिधा मन के फैलाव के मिहनत अब किसान मन के जीपन म सुघड़ बदलाव लावत हे। बलरामपुर जिला के विकासखण्ड शंकरगढ़ के भितरी आवइया ग्राम पंचायत खैराडीह म बने पक्की सिंचई नाली ह किसान मन बर नवा उम्मेद बनके आगू आय हे।
बछर 2025-26 म मनरेगा के तहत लगभग 800 मीटर लांभी पक्की सिंचई नाली के निर्माण करवाए गीस। ए काम ले गांव के किसान मन ला अब खेत मन तक समे म अउ बराबर पानी मिले बर धर लीस हे। पहिली किसान मन सिरिफ पानी गिरे (बारिश) उपर भरोसा रख के खेती करत रहिन अउ नहर के पानी ला खेत तक ले जाए बर कामचलाऊ कच्ची नाली बनाए बर परत रहीस। हर बछर पानी गिरे ले अउ टूट-फूट के सेती ए नाली मन ला नुकसान पहुचत रहीस, जेकर ले किसान मन के मिहनत अउ खरचा दूनों बाढ़ जावत रहीस।
गांव वाले मन के मांग म बने पक्की नाली ह अब ए समिस्या के पक्का समाधान कर दिन हे। अभी के समे म ए नाली के रद्दा ले लगभग 200 ले 250 एकड़ खेती के भुइयां म सिंचई के सुबिधा मिलत हे, जेकर ले गांव के 11 किसान मन ला सोझा फायदा होवत हे। खेत मन तक सुघड़ ढंग ले पानी पहुंचे के सेती फसल के पैदावार बाढ़ गे हे अउ किसान मन अब खरीफ के संग च रबी सीजन म घलो खेती कर पावत हें।
किसान मन के कहना हे कि सिंचई सुबिधा सुघर होय ले खेती के खरचा घटे हे अउ पैदावार बाढ़े हे। एकर ले उंकर कमाई म बढ़ाव होय के संग आर्थिक दशा घलो मजबूत होइस हे। गांव के लोगन मन ह मनरेगा के तहत करे गय ए काम ला गांव के बिकास अउ किसान मन के संबरिद्धि के डहर म बड़ कदम बतॉइन हें।
जिला म मनरेगा के माध्यम ले पानी बचाव, सिंचई के फैलाव अउ गांव के बुनियादी ढांचा के बिकास के अइसन काम लगातार करे जावत हे, जेकर ले गांव के अर्थव्यवस्था ला मजबूती मिलत हे अउ किसान मन के जीपन स्तर ह अउ सुघर होवत हे।
हमर चैनल ला सब्सक्राइब करव अऊ मया देवव
Whatsapp –https://whatsapp.com/channel/0029VaPmGTXInlqS2WQAhw1n
YouTube –https://youtube.com/@jayjohar?si=AZDI5zciOCT3Oqhw
Facebook –https://www.facebook.com/share/18GsFBTgfd/
