मुख्य सचिव ह समग्र शिक्षा अभियान 2026 के बजट प्लान के बैठक लीन- गुणवत्ता अउ नवाचार ऊपर दीन बिसेस जोर
स्कूल इंफ्रास्ट्रक्चर, डिजिटल क्लासरूम अउ शिक्षक प्रशिक्षण बर तय होही प्राथमिकता
रायपुर, मुख्य सचिव विकासशील के अध्यक्षता में आज इहाँ मंत्रालय महानदी भवन में छत्तीसगढ़ समग्र शिक्षा कार्यकारिणी समिति के बैठक सम्पन्न होइस। बैठक में बछरी कार्य योजना अउ बजट बछर 2026-27 के प्रस्ताव ऊपर बिस्तार से चर्चा होइस। एही रकम से समग्र शिक्षा के अंतर्गत मंजूर नवा काम मन के युक्तियुक्तकरण के बाद जगह बदले अउ आने-आने बिंदु मन के प्रस्ताव ऊपर चर्चा के बाद ओला मंजूरी दे गिस। स्कूल शिक्षा विभाग के अंतर्गत आने-आने निर्माण काम मन ला शाला प्रबंधन समिति के माध्यम से कराये जाय वाले काम के प्रस्ताव मन ऊपर घलो गोठ-बात होइस।
बैठक में मुख्य सचिव विकासशील ह 2026-27 के बछरी कार्ययोजना अउ बजट प्लान ला लेके बिस्तार से चर्चा करिन। ओमन शिक्षा के गुणवत्ता, पहुंच अउ समावेशी बिकास ऊपर बिसेस जोर दीन। मुख्य सचिव ह निरदेस दीन कि बजट प्लान में सिरिफ भवन निर्माण नोहे, बल्कि लर्निंग आउटकम (पढ़ई के नतीजा) सुधारे वाले नवाचार मन ला प्राथमिकता दे जाय। ओमन कहिन कि हर लइका ला गुणवत्तापूर्ण शिक्षा मिले, एकर बर स्कूल मन में संसाधन, शिक्षक अउ तकनीक तीनों ला मजबूत करना होही।
लइका मन के ड्राप आउट ला रोके बर करव प्रयास
मुख्य सचिव ह कहिन कि स्कूल मन में लइका मन के ड्राप आउट (स्कूल छोड़े) के स्थिति ऊपर बिसेस नजर रखे जाय। माध्यमिक-उच्चतर माध्यमिक स्कूल मन में स्मार्ट क्लासरूम अउ आईसीटी लैब बनाय जाही। जम्मो स्कूल मन में हाई-स्पीड इंटरनेट के ब्यवस्था होही। ड्रॉपआउट रोके बर कक्षा 1, 8 अउ 10 में ड्रॉपआउट दर ला सुन्ना (जीरो) करे बर बिसेस ट्रैकिंग सिस्टम बनही। साला त्यागी (स्कूल छोड़े) लइका मन ला मुख्यधारा में लाय बर ब्रिज कोर्स चलाय जाही।
शिक्षक प्रशिक्षण
राष्ट्रीय शिक्षा नीति के मुताबिक जम्मो शिक्षक मन ला फेज-वाइज (किस्तवार) प्रशिक्षण दे जाय। गणित-विज्ञान-अंग्रेजी बर बिसेस मास्टर ट्रेनर पूल तइयार होही। बुनियादी सुविधा के जरूरत वाले स्कूल मन में अतरिक्त कमरा, नोनी मन बर शौचालय, पीये के पानी, बिजली अउ बाउंड्रीवॉल के काम ला प्राथमिकता से करे जाही।
समावेशी शिक्षा
दिव्यांग लइका मन बर संसाधन कक्ष, थेरेपी यूनिट अउ बिसेस टीएलएम के प्रावधान बजट में रखे जाही। कौशल बिकास बर कक्षा 9वीं ले 12वीं तक वोकेशनल एजुकेशन (ब्यवसायिक शिक्षा) ला मजबूत करे जाही। खेती-किसानी, आईटी, हेल्थकेयर अउ टूरिज्म जइसन ट्रेड मन में स्थानीय जरूरत के मुताबिक कोर्स चलाय जाही।
हमर चैनल ला सब्सक्राइब करव अऊ मया देवव
Whatsapp –https://whatsapp.com/channel/0029VaPmGTXInlqS2WQAhw1n
YouTube –https://youtube.com/@jayjohar?si=AZDI5zciOCT3Oqhw
Facebook –https://www.facebook.com/share/18GsFBTgfd/
