जिला पंचायत मनला घलो मिलही गौण खनिज निधि के हिस्सा
मुख्यमंत्री साय के घोसन के होइस पालन
रायपुर, छत्तीसगढ़ सरकार ह त्रिस्तरीय पंचायत ब्यवस्था ला अउ जादा मजबूत बनाय के डहर मं बड़े फैसला लेवत हूए जिला पंचायत मनला घलो गौण खनिज ले मिलइया रॉयल्टी राजस्व रासि मं हिस्सा देके आदेस (आदेश) जारी कर दे हे। राष्ट्रीय पंचायत दिवस के मौका मं रखे गे राज-स्तर के कार्यक्रम मं जिला पंचायत अध्यक्ष रायपुर नवीन कुमार अग्रवाल ह मुख्यमंत्री विष्णु देव साय ले जिला पंचायत मनला घलो गौण खनिज निधि के हिस्सा देवाय के मांग करे रहिस। मुख्यमंत्री ह मंच ले ही ए मांग ला मानत हूए घोसन (घोषणा) करे रहिन, जेकर अब राज सरकार कोति ले पालन कर दिये गे हे।
खनिज साधन बिभाग डहर ले जारी आदेस के मुताबिक, गौण खनिज ले मिलइया कुल राजस्व के 33 प्रतिसत (प्रतिशत) हिस्सा ह पंचायत एवं ग्रामीण विकास बिभाग ला पहिली जइसन ही दिये जाही, जबकि बचे हूए 67 प्रतिसत रासि के बंटवारा ग्राम पंचायत, जनपद पंचायत अउ जिला पंचायत मनके बीच तय करे गे स्लैब के हिसाब से करे जाही।
जारी आदेस के तहत 7.50 लाख रूपया तक के रासि ह पूरा के पूरा ग्राम पंचायत ला मिलही। 7.50 लाख ले 10 लाख रूपया तक के रासि मं 80 प्रतिसत ग्राम पंचायत ला, 10 प्रतिसत जनपद पंचायत ला अउ 10 प्रतिसत जिला पंचायत ला दिये जाही। 10 लाख ले 25 लाख रूपया तक के रासि मं ग्राम पंचायत ला 70 प्रतिसत अउ जनपद अउ जिला पंचायत ला 15-15 प्रतिसत हिस्सा मिलही। इही किसम ले 25 लाख ले 50 लाख रूपया तक के रासि मं ग्राम पंचायत ला 60 प्रतिसत अउ जनपद व जिला पंचायत ला 20-20 प्रतिसत हिस्सा दिये जाही। 50 लाख रूपया ले जादा के रासि मं ग्राम पंचायत ला 50 प्रतिसत अउ जनपद व जिला पंचायत ला 25-25 प्रतिसत रासि मिलही।
राज सरकार ह ए निधि (पैसा) के उपयोग के दइरा (दायरा) ला घलो बढ़ा दे हे। अब ए रासि के खरचा स्कूल अउ अस्पताल मन मं रनिंग वाटर (नळ के पानी) के सुबिधा, सामुदायिक टॉयलेट (शौचालय), मरघट (मुक्तिधाम) निर्माण, पहुंच मारग अउ वाचनालय (लाइब्रेरी) बनाय जइसन काम मन मं करे जा सकी। जिला पंचायत मनला मिलइया रासि के खरचा ओ इलाका मनके बिकास काम मं करे जाही, जहां खदान के काम ले खराब असर पड़त हे।
मुख्यमंत्री विष्णु देव साय ह कहिन कि राज सरकार ह पंचायत मनला आर्थिक रूप ले मजबूत बनाय अउ गांव मन मं बिकास के काम ला गति देवाय बर लगातार काम करत हे। ओमन कहिन कि जिला पंचायत मनला गौण खनिज निधि मं हिस्सेदारी मिले ले स्थानीय बिकास योजना मनला मजबूती मिलही अउ त्रिस्तरीय पंचायत ब्यवस्था ह अउ जादा असरदार बनही
।मुख्यमंत्री के घोसन के पालन होय ले जिला पंचायत अध्यक्ष रायपुर नवीन कुमार अग्रवाल के संग-संग दूसर पंचायत प्रतिनिधि मन घलो गदगद हंव अउ खुसी जताय हंव। ओमन कहिन कि ए फैसला ले पंचायत के कामकाज अउ संचालन ब्यवस्था ला नवा मजबूती मिलही अउ ग्रामीण इलाका मं बिकास के काम मनला अउ तेजी मिलही।
