‘नगरीय निकाय से तालमेल करके सहर के बीच बनइया सड़क मन में निर्माण के बेरा ही नाली, अंडरग्राउंड केबल, पाइपलाइन बर प्रावधान करव’

लोक निर्माण विभाग के सचिव ह रायपुर परिक्षेत्र के दोनों मंडल के काम मन के समीक्षा करिन

चालू अउ पिछले वित्तीय बछर के काम मन के प्राथमिकता सूची तइयार करे के दीन निरदेस, 31 जुलाई तक प्राक्कलन (एस्टीमेट) भेजे बर कहिन

बरसात के पहिली सड़क मन के मरम्मत करे के निरदेस

रायपुर, लोक निर्माण विभाग के सचिव मुकेश कुमार बंसल ह आज रायपुर परिक्षेत्र के दोनों मंडल के काम मन के समीक्षा करिन। ओमन नवा रायपुर में पीडब्लूडी मुख्यालय निर्माण भवन में राखिस बैठक में अधिकारी मन ले दोनों मंडल में मंजूर, निर्माणाधीन अउ निविदा (टेंडर) प्रक्रिया के बढ़ती के जानकारी लीन अउ जरूरी निरदेस दीन। ओमन बरसात के पहिली जम्मो सड़क मन के मरम्मत करके ओमन ला गड्डामुक्त करे बर कहिन। लोक निर्माण विभाग के प्रमुख अभियंता वी.के. भतपहरी, मुख्य अभियंता पी.एम. कश्यप अउ टी.आर. कुंजाम घलो बैठक में मौजूद रहिन।

लोक निर्माण विभाग के सचिव ह बैठक में अधिकारी मन ला चालू वित्तीय बछर 2026-27 अउ पिछले वित्तीय बछर 2025-26 में मंजूर काम मन के प्राथमिकता सूची तइयार करके 10 जून तक भेजे के निरदेस दीन। ओमन 31 जुलाई तक ए जम्मो काम मन के प्राक्कलन (एस्टीमेट) घलो भेजे बर कहिन। ओमन सरकारी पैसा के सही उपयोग अउ निर्माण काम मन ले जादा से जादा नागरिक मन ला फायदा पहूंचाए बर विभाग कोति ले करे जात काम मन के पूरा उपयोगिता (Functionality) अउ टिकाऊपन (Sustainability) पक्का करे के निरदेस दीन। ओमन हर निर्माण काम में निर्माण अउ निर्माण सामग्री के गुणवत्ता ऊपर जोर देवत हुए काम मन ला समय-सीमा में पूरा करे बर कहिन।

विभागीय सचिव ह अनुविभागीय अधिकारी मन ले लेके प्रमुख अभियंता तक जम्मो अधिकारी मन ला प्रत्येक मंगलवार के दिनभर मुख्यालय में ही रहे के निरदेस दीन। ओमन रायपुर परिक्षेत्र में भवन अउ सड़क निर्माण के काम मन के बढ़ती के समीक्षा करत हुए अधिकारी मन ला भबिस्य के जरूरत मन के मुताबिक जम्मो सड़क खंड मन ऊपर फ्लाई-ओवर्स के बड़े योजना मन के साथ काम करे के निरदेस दीन। ओमन सड़क चौड़ीकरण के परियोजना मन में पुल-पुलिया अउ राष्ट्रीय राजमार्ग के हिस्सा परे ऊपर ओकर घलो चौड़ीकरण के कार्ययोजना के साथ काम करे बर कहिन।

बंसल ह कहिन कि गुणवत्ता अउ समय-सीमा में काम करना सरकार के सबले बड़े प्राथमिकता हे। विभागीय अधिकारी मन अपन सुब्यवस्थित अउ समयबद्ध काम मन ले नागरिक मन अउ जनप्रतिनिधि मन के बीच विभाग के बढ़िया नाम बनावन। जम्मो काम मन ला पूरा जवाबदेही, सक्रियता अउ कड़ाई से पूरा करव। ओमन रायपुर अउ नवा रायपुर में काम मन के सहूलियत अउ विभाग के काम मन में प्रशासनिक कसावट बर रायपुर मंडल क्रमांक-1 के चारों संभाग मन ला पुनर्गठित करके कार्यक्षेत्र मन के नवा सिरा से बंटवारा करे बर कहिन।

ओमन विभागीय अधिकारी मन ला सहर के बीच बनइया सड़क मन के निर्माण के पहिली संबधित नगरीय निकाय से तालमेल करके भबिस्य बर नाली, अंडरग्राउंड केबल फिटिंग, पाइपलाइन इत्यादि बर पहिली से प्रावधान करे बर कहिन, ताकि सड़क मन ला बार-बार कोड़े के जरूरत न पड़े। ओमन अधिकारी मन ला अपन कार्यक्षेत्र के सड़क मन के स्थिति के पूरा जानकारी रखे बर कहिन अउ परफार्मेंस गारंटी वाली सड़क मन में सुधार के जरूरत ऊपर संबंधित ठेकेदार मन ले तुरंते मरम्मत करावे बर कहिन।

लोक निर्माण विभाग के सचिव ह नवा सड़क मन के प्रस्ताव तइयार करत बेरा आवइया दस बछर के ट्रैफिक, आबादी के जरूरत अउ आसपास होवइया बिकास परियोजना मन ला ध्यान में रखे बर कहिन। ओमन भवन मन में बढ़िया गुणवत्ता के निर्माण सामग्री, खिड़की, कपाट (दरवाजा), टाइल्स, पेंट, पुट्टी, सेनिटरी फिटिंग, नल, इलेक्ट्रिक फिटिंग इत्यादि के उपयोग करत हुए जम्मो भवन मन में दिव्यांग मन बर रैंप अउ रेलिंग के घलो प्रावधान करे के निरदेस दीन। ओमन भवन के साथ ही पूरा परिसर में सही रस्ता, हरियाली, साफ-सफाई अउ बाउंड्री-वॉल के कार्ययोजना ऊपर जोर दीन, ताकि भवन मन के जादा से जादा उपयोग पक्का करे जा सके।

ओमन सहर के जम्मो सड़क मन के कति (किनारे) अउ डिवाइडर्स ऊपर झाड़ी, घास-फूस अउ कचरा मन ला हटाके बढ़िया साफ-सफाई रखे बर कहिन। ओमन रायपुर नगर निगम के साथ मिलके सड़क के दोनों कति के नाली मन के सफाई करावे के निरदेस दीन, ताकि पानी बरसे के सेती सड़क मन ऊपर पानी झन भराए। ओमन लोक निर्माण विभाग के संपत्तियों, पोल्स अउ डिवाइडर्स ऊपर बिना अनुमति के विज्ञापन, बैनर, पोस्टर, होर्डिंग अउ फ्लेक्स लगाए वाले मन ऊपर संपत्ति विरूपण के कार्रवाई करे के घलो निरदेस दीन। रायपुर परिक्षेत्र के दोनों मंडल के अधीक्षण अभियंता, जम्मो संभाग के कार्यपालन अभियंता तथा अनुविभागीय अधिकारी घलो बैठक में मौजूद रहिन।

हमर चैनल ला सब्सक्राइब करव अऊ मया देवव
Whatsapp – https://whatsapp.com/channel/0029VaPmGTXInlqS2WQAhw1n
YouTube – https://youtube.com/@jayjohar?si=AZDI5zciOCT3Oqhw
Facebook – https://www.facebook.com/share/18GsFBTgfd/