बछर 2025–26 म ₹16,625 करोड़ के प्राप्ति.. पारदर्शी प्रबंधन अउ तकनीकी नवाचार ले हासिल मिलिस सफलता
रायपुर. मुख्यमंत्री विष्णुदेव साय के अगुवाई म छत्तीसगढ़ सरकार डहर ले खनिज क्षेत्र म पारदर्शिता, तकनीकी नवाचार अउ मजबूत प्रबंधन ला प्राथमिकता देवत गजब के (उल्लेखनीय) उपलब्धि हासिल करे गे हे।
खनिज विभाग के सचिव पी दयानंद ह बताइस कि छत्तीसगढ़ ह वित्तीय बछर 2025–26 म ₹16,625 करोड़ के खनिज राजस्व कमाके (अर्जित करके) लक्ष्य के 98 प्रतिशत प्राप्त करे हे, जेन हा सुशासन, प्रभावी नीति क्रियान्वयन अउ मजबूत निगरानी व्यवस्था के सीधा (प्रत्यक्ष) परिनाम आय। ये उपलब्धि ह न सिरिफ प्रभावी प्रशासनिक रणनीति के परिनाम आय, बल्कि राज के खनिज आधारित अर्थव्यवस्था के मजबूती ला घलो देखाथे।
ये बछर खनिज राजस्व म 14 प्रतिशत के बछर-दर-बछर बाढ़त दर्ज करे गे हे, जेन हा पिछलू पांच बछर के औसत वार्षिक वृद्धि दर (CAGR) 6 प्रतिशत ले दुगुना ले जादा हे। ये बाढ़त हा राज सासन डहर ले अपनाय गे सुधारात्मक अउ तकनीकी उपाय मन के सफलता ला रेखांकित करथे।
खनिज राजस्व म ये बाढ़त के मुख्य कारन मन म एनएमडीसी (NMDC) अउ आन सार्वजनिक उपक्रम मन बर डिस्पैच रूट्स के प्रभावी अनुकूलन सामिल हे। एकर संगे-संग, ‘खनिज 2.0’ (Khanij 2.0) जइसन आईटी-आधारित प्लेटफॉर्म के माध्यम ले पारदर्शिता, निगरानी अउ संचालन दक्षता म गजब के सुधार होय हे।
आघू अइया (आगामी) वित्तीय बछर म राज सरकार के बिसेस धियान गौण खनिज मन ला घलो ‘खनिज 2.0’ प्लेटफॉर्म ले जोड़े म रइही, जेकर ले जम्मो (संपूर्ण) खनन प्रणाली ला डिजिटल अउ एकीकृत बनाए जा सकय। एकर अलावा, खनिज परिवहन के निगरानी ला अउ जादा मजबूत करे बर वीटीएस (VTS), आई-चेक गेट्स ( i Check Gates) अउ ड्रोन आधारित निगरानी प्रणाली ला अउ बड़ (व्यापक) स्तर म लागू करे जाही।
छत्तीसगढ़ सरकार के उद्देस्य खनिज संसाधन मन के प्रबंधन म पारदर्शिता, दक्षता अउ जवाबदेही सुनिश्चित करत राजस्व म लगातार बाढ़त करना आय। ये प्रयास मन ले न सिरिफ राज के आर्थिक स्थिति मजबूत होही, बल्कि विकास के बुता बर संसाधन मन के उपलब्धता घलो सुनिश्चित होही
– विष्णु देव साय, मुख्यमंत्री छत्तीसगढ़
