चुनाइ के मद्देनजर एकात्म परिसर हे सुभ

रायपुर। भाजपा ह अपन पुराना प्रदेश कारयलय एकात्म परिसर स सुभ मान थे। काबर के पाछू के तीन विधानसभा चुनाव मन भाजपा ह ये भवन ले जीत दरज करिस हे। अउ उंखर प्रदेस स्तरीय चुनाई प्रबंधन एकात्म परिसर ले होय रहिस हे। अब चउथी पारी बर फेर भाजपा ये हे चुनाइ के संचालन कर ही। भाजपा के पदाधिकारी मन के कहिना हे के चउथी बार सरकार बनाय बर येकर ले बेहतर कोनो भवन नइए।
एक बार फेर प्रदेश भाजपा छत्तीसगढ़ विधानसभा चुनाइ म अपन चुनावी टोटका ल आजमाना चाहत हे। येकर सेती प्रदेस स्तरीय इलेक्सन वार रूम नवा ले पुराना भवन म सिफ्ट करे जात हे। ये दउरान मुख्यमंत्री रमन सिंह, राष्ट्रीय सह संगठनमंत्री सौदान सिंह पूजा अरचना कर येकर सुभारंभ करही।
बता देन क वइसे त प्रदेस भाजपा कारयलय डूमरतराई म पहिली ले ही सिफ्ट हो चुके हे। पीछु कुछु बछर म पार्टी के गतिविधि मन उहें ले चलत हे। लेकिन अब चुनाव के मद्देनजर पुराना प्रदेश कारयलय एकात्म परिसर ल ही शुभ माने जात हे। येकर पीछु घलोक कारण हे के अब तक के पाछु के तीन विधानसभा चुना इ मन के प्रदेसस्तरीय प्रबंधन एकात्म परिसर कारयलय से करे गेहे।
उहें बीजेपी ह जब नवा कारयलय के निरमान कराय त मेन रोड उपर म दरवाजा के मुख दकिछ्न रहिस हे। येला देखत हुए बगल से गेट निकाले गिस। नवा कारयलय के द्वार उत्तर दिसा होय के बाद भी चुनाइ समिति के बइठक ये भवन म नइ होवत रहिस हे। नवा कारयलय के बजाय चुनाइ संबंधी सबो निरनय बीजेपी के पुराना कारयलय एकात्म परिसर ले करे जात हे।
पार्टी सूत्र मन के मुताबिक चुनाइ के मद्देनजर एकात्म परिसर स्थित पुराना प्रदेस कारयलय म गुजरात के तरज म वार रूम तइयार हो चुके हे। ये वार रूम म अलग-अलग सेक्टर के हिसाब ले काम ल बांटे गेहे। सोसल मीडिया टीम, मीडिया टीम अउ चुनाव म जिला मन ले संपरक करइया के टीम ल विसेस महत्व देय गेहे। ये टीम सीधा प्रदेस के 90 विधान सभा के मानिटरिंग करही।