जमीन ल बेच के लाखों हड़पिस, बिना रजिस्ट्री कराए हो गे फरार, 1 साल बाद गिरफ्तार

बेमेतरा। जमीन ल अपन बता के बेच दिस अउ खरीददार ले लाखों रूपिया घलो ले लिस। फेर जब जमीन के रजिस्ट्री कराए के बारी अईस त जमीन बेचईया मन फरार हो गे। वो फरार आरोपी मन ल एक साल बाद गिरफ्तार करे म पुलिस ल सफलता मिलिस हे।

ये पूरा मामला बेमेतरा थाना के पदमी गांव के हरे। इहां के प्रेमसागर पटेल ह बेमेतरा थाना म रिपोर्ट लिखाए रहीस कि आरोपी हेमंत चौधरी अउ कोक सिंह ह बासनी गांव म जमीन ल अपन बता के सौदा करे के नाम म उंखर ले 31 लाख रूपिया ले लिस। आरोपी मन जब रजिस्ट्री कराए के बारी अईस त बात ल टाल देत रहीस अउ पईसा लेके फरार हो गे।

बेमेतरा सिटी कोतवाली म आरोपी हेमंत चौधरी अउ कोक सिंह के ऊपर धोखाधड़ी के मामला दर्ज करे गे हे। ये आरोपी मन ल एक साल बाद पुलिस ह गिरफ्तार कर न्यायिक रिमांड पर जेल भेजीन हे।