Raipur: ए विश्वविद्यालय म स्नातकोत्तर अऊ पीएचडी पाठ्यक्रम म काली ले सुरू होही दाखिला, पढो पूरा खबर

जय जोहार…. (Raipur) इंदिरा गांधी कृषि विश्वविद्यालय के अंतर्गत संचालित कृषि, उद्यानिकी अऊ कृषि अभियांत्रिकी महाविद्यालय म स्नातकोत्तर अऊ पीएचडी पाठ्यक्रम म दाखिला के प्रक्रिया अब 22 सितंबर ले सुरु करे जाही। कोविड-19 संक्रमण ल धियान म रखत हुये ए पाठ्यक्रम म बिना प्रवेश पिछले उपाधि के प्राप्तांक के आधार म सीधा दाखिला दे जाही।

ए पाठ्यक्रम म प्रवेश के इच्छुक विद्यार्थी ह इंदिरा गांधी कृषि विश्वविद्यालय (Raipur) के वेबसाइट म 22 सितंबर ले 18 अक्टूबर तक आनलाइन आवेदन कर सकत हे। प्रवेश के संबंध  म छत्तीसगढ़ सरकार के तरफ ले तय आरक्षण नियम ह लागू होही। आरक्षित सबो पाठ्यक्रम म एक-एक सीट जम्मू कश्यम के विद्यार्थी मन बर आरक्षित करे गे हे।

बता दन कि कोविड-19 संक्रमण सती इंदिरा गांधी कृषि विश्वविद्यालय (Raipur) के अंतर्गत संचालित महाविद्यालय म स्नातकोत्तर अऊ पीएचडी पाठ्यक्रम म प्रवेश बर ए साल संयुक्त पात्रता परीक्षा के आयोजन ल नई करे जावत हे। ए पाठ्यक्रम म पिछिले उपाधि के प्राप्तांक के आधार म सीधा प्रवेश दे जाही।