राजधानी म तीन नवा कोरोना मरीज मिले के बाद ए इलाके ह होइस कन्टेनमेंट जोन घोसित

जय जोहार…. राजधानी रायपुर म सोमवार के कोरोना के तीन नवा मरीज मिले के बाद जिला प्रशासन ह कई इलाके ल कन्टेनमेंट जोन घोसित करे हे। ए तीन इलाके म सब्बो दुकान, आफिस अऊ आन वाणिज्यिक प्रतिष्ठान ह अवइया आदेश तक बंद रही। सिरिफ होम डिलीवरी ले आवश्यक सामग्री दे जा सकही। केवल मेडिकल इमरजेंसी ल छोड़ के कोनाे अंदर ले बाहर अऊ बाहर ले अंदर नई जा सकही। वो घलो सिरिफ एक प्रवेश द्वार ले मिलही। सोशल डिस्टेंसिंग अऊ मास्क लगाना ह अनिवार्य होही। बता देन कि राजधानी म अब तक 18 संक्रमित मरीज ह मिल चुके हे। जेमा ले 9 सक्रिय केस हे। जबकि एक कोरोना पाजिटिव मरीज के मौत हो गे हे।

स्वास्थ्य अऊ परिवार कल्याण विभाग के तरफ ले जारी गाइडलाइन के अनुसार जिला प्रशासन ह रायपुर के गुरुकुल सिंह नगर, न्यू राजेद्रनगर म एक नवा कोरोना पाजिटिव मरीज केस पाय जाय के बाद क्षेत्र ल कन्टेनमेंट जोन घोसित करे हे। पूर्व म केनाल रोड प्रवेश द्वार, पश्चिम म आम्रपाली गेट, उत्तर म आयशा मस्जिद के रोड, दक्षिण म एनएच 30 ले प्रवेश द्वार ल कंटेनमेंट जोन घोसित करे गे हे।

रायपुर के प्रगति नगर गुढ़ियारी म एक नवा कोरोना पाजिटिव केस पाय जाये के बाद पूर्व म मारूति जिम के पास, पश्चिम म प्रीतमनगर नाला, टीचर कालोनी जवइया पूल, उत्तर म संतोष किराना स्टोर्स के पास, रेलवे कालोनी अशोक नगर के पहले अऊ दक्षिण म श्मशान छोटा अशोक नगर के पास, अजय सेलून चिराहा त कन्टेनमेंट जोन घोसित करे गे हे।

रायपुर के रावणभाठा बिरगांव थाना खमतराई म कोरोना मरीज मिले के बाद पूर्व म बांधा तालाब रोड, पश्चिम म मेटल पार्क रोड, कच्ची सड़क, उत्तर म सेंदरी तालाब, मदरसा रोड अऊ दक्षिण म शुक्रवारी बाजार स्थल ल कंटेनमेंट जोन घोसित करे गे हे।