कृषि मंत्री ह वन सहिद स्मारक के करिन लोकार्पण: सहिद वन करमी मन के बलिदान ला करिन नमन
वन, पर्यावरण अउ वन्यजीव मन के सुरछा हम सब के जिम्मेदारी – मंत्री श्री नेताम
रायपुर .आदिम जाति विकास, कृषि अउ किसान कल्याण मंत्री रामविचार नेताम ह बलरामपुर-रामानुजगंज जिला के दौरा म पहुंचिन। ए बेरा म ओ मन ह वनमंडलाधिकारी (DFO) दफ्तर के परिसर म बने वन सहिद स्मारक के लोकार्पण करिन अउ सहिद मन ला सरधांजलि अर्पित करिन। संग म आन जनप्रतिनिधि अउ अधिकारी मन घलो सहिद मन ला सुरता करके सरधा सुमन चढ़ाइन।
मंत्री रामविचार नेताम ह कार्यक्रम म कहिन कि ए परिसर म बने सहिद स्मारक हमर वन करमी मन के अटूट साहस अउ बलिदान के चिनहा आय। ए ओ वीर मनखे मन के सुरता आय जेमन अपन ड्यूटी निभात बखत नक्सली मन ले लोहा लीन अउ अपन परान न्योछावर कर दीन।
ओ मन कहिन कि दुरिहा अउ कठिन इलाका म जंगल अउ पर्यावरण के सुरछा करना बड़े चुनौती के काम आय। वन करमी मन हर किसम के मुस्किल परिस्थिति म घलो अपन जिम्मेदारी ला निभाथें अउ जंगल के धन अउ जंगली जानवर मन के रखवारी म जुटे रहिथें। मंत्री जी ह बताइन कि अवैध कटाई, जंगल के आगी (वनाग्नि), अवैध कब्जा अउ अवैध सिकार कस काम ले जंगल ला हमेशा खतरा बने रहिथे, अइसन म वन विभाग के करमचारी मन के भूमिका अउ जादा जरूरी हो जथे।सहिद मन ला सुरता करत मंत्री जी ह कहिन कि ओ मन के दिये गे ए सबले बड़े बलिदान ह हम सब ला हमेशा प्रेरणा देवत रहिही।
ओ मन कहिन कि जंगल अउ पर्यावरण के सेती ही मनखे मन के जिनगी संभव हे, एखर सेती ए मन के रखवारी करना हम सब के जिम्मेदारी आय। मंत्री श्री नेताम ह कहिन कि गांव-देहात म रहइया मनखे मन कोनो न कोनो रूप ले जंगल के भरोसा म रहिथें, एखर सेती जंगल ला बचाना बहुत जरूरी हे। ओ मन दुख जतावत कहिन कि जंगल म आगी लगे के घटना ले कई किसम के रुख-राई, जड़ी-बूटी, अउ जंगली जानवर मन खतम हो जावत हें, जे ह बड़ चिंता के बात आय। ओ मन सबो नागरिक मन ले अरजी करिन कि जंगल ला बचाए बर आगू आवं अउ अवैध कटाई, कब्जा अउ आगी लगाय कस काम ला रोके म मदद करं।
बढ़त गरमी ला देखत ओ मन कहिन कि जंगल म आगी झन लगय एखर बर होसियार रहे के जरूरत हे, अउ जे मनखे मन जान-बूझ के अइसन गलत काम करथें ओ मन ऊपर कड़ी कारवाही करे जाय। मंत्री श्री नेताम ह कहिन कि हर नागरिक के ए धरम आय कि ओ ह पर्यावरण ला बचाय म अपन हाथ बटावय, जेखर ले आघू के पीढ़ी बर हमर जंगल के धन सुरक्षित अउ समृद्ध बने रहय।
ए मउका म रेड क्रॉस सोसायटी के अध्यक्ष ओम प्रकाश जायसवाल, जिला पंचायत उपाध्यक्ष धीरज सिंह देव, नगर पालिका अध्यक्ष लोधी राम एक्का, उपाध्यक्ष दिलीप सोनी, बबली देवी संग आन जनप्रतिनिधि मन, कलेक्टर राजेंद्र कटारा, पुलिस अधीक्षक वैभव बैंकर, वनमंडलाधिकारी आलोक बाजपेयी अउ अधिकारी-करमचारी मन उपस्थित रहिन।
