अजीत जोगी के निधन ह छत्तीसगढ़ बर अपूरणीय क्षति – सीएम भूपेश बघेल

जय जोहार…. मुख्यमंत्री भूपेश बघेल ह छत्तीसगढ़ के प्रथम मुख्यमंत्री अजीत प्रमोद कुमार जोगी के निधन म गहरा दुख प्रकट करे हे। अजीत जोगी के आज रायपुर के एक निजी चिकित्सालय म इलाज के दौरान निधन हो गिस। मुख्यमंत्री बघेल ह अजीत जोगी के निधन म राज्य म आज ले तीन दिन के राजकीय शोक घोसित करे हे। ए दौरान राष्ट्रीय ध्वज ह आधा झुका रही अऊ ए दौरान कोनो घलो शासकीय सामारोह आयोजित नई करे जाही। जोगी के अंतिम संस्कार पूरा राजकीय सम्मान के संग काली 30 मई के गौरेला म होही।

मुख्यमंत्री बघेल ह अपन शोक संदेस म कहिन कि जोगी के निधन ह छत्तीसगढ़ बर अपूरणीय क्षति हे। सीएम ह प्रदेश के विकास म जोगी के योगदान ल स्मरण करत हुये कहिन कि राज्य बने के बाद जोगी ह छत्तीसगढ़ राज्य के तीव्र विकास के रूपरेखा ल तैयार अऊ एक कुशल राजनीतिज्ञ अऊ प्रशासक के रूप म राज्य ल आगू बढ़ाय म महत्वपूर्ण भूमिका ल अदा करिस।