अजीत जोगी ह कदम वापिस खींचिस, नई लड़य चुनाव

कोरबा समेत शेष तीन सीट मन म फइसला आज

रायपुर. कोरबा सीट ले चुनाव लड़े के ऐलान करने के बाद छत्तीसगढ़ जनता कांग्रेस सुप्रीमो अजीत जोगी ह अपन कदम वापस खींच ले हे. अउ अब उमन उहां ले चुनाव नई लड़य

. कोरबा सीट ले चुनाव कउन लड़ही. एमा फइसला मंगलवार को होही. कोरबा के संगेच ही बिलासपुर अउ रायपुर सीट बर प्रत्याशी काली तय होही. काली बीएसपी के नेता मन के संग अजीत जोगी के बिहनिया 11 बजे बइठक होही. जेमा तीनों सीट मन बर प्रत्याशी तय करे जाही.

दूसर बेर हे जब अजीत जोगी ह चुनाव लड़े के ऐलान कर अपन कदम वापस खींच लिस हे. एखर पहिली विधानसभा चुनाव म उमन कसडोल अउ राजनांदगांव ले चुनाव लड़े के बात कहे रिहिस हे. लेकिन उमन उहां ले घलो चुनाव नई लड़ीन. फेर अब लोकसभा चुनाव म कोरबा सीट उमन चुनाव लड़े के बात कहे रिहिन हे.लेकिन अब उमन उहां ले घलो चुनाव नइ लड़िस हे. हालांकि अजीत जोगी खुलके ये बातें नई कहिन. उमन अभु घलो अपन चुनाव लड़े म सस्पेंस कायम कर रखे हे.

पत्रकार मन ले चर्चा म जब उमन ले ये सवाल बार-बार करे गिस कि, आप चुनाव कोरबा ले लड़त हवय के नई, एखर घलो स्पष्ट जवाब जोगी ह नई दिस हे. जोगी ह ये ही कहिस के, अभु त एक अप्रैल हे, 4 अप्रैल नामांकन बर आखरी दिन हे, त फइसला बर अभी काफी वक्त हे, अभु हमार अउ नेता हे, मोला अकेला फइसला नई लेना हे. बाकी सबो नेता मिलके फइसला करही. ये तरह ले गोलमोल जवाब अजीत जोगी पत्रकार मन के सवाल म देवत रहिन हे.

लेकिन अजीत जोगी ह एक अउ चउकाएं वाले बात कहिन, उमन कहिन के, मोर से नई लेकिन पार्टी के दूसर नेता मन ले दूनों ही राजनीतिक दल मन (कांग्रेस और भाजपा) के नेता मन ह संपर्क करत हवय. अब ये संपर्क कउन स्तर के ह, काबर करते हे, येखर खुलासा उमन नई करिन हे. उँखर बात ले ये लगत हे के, जोगी या जोगी पार्टी ह चुनाव नई लड़ना चाहत हे.