रायपुर । छत्तीसगढ़ म बीते पंद्रह बछर ले सत्ता म काबिज बीजेपी हो या सत्ता के वनवास झेलत कांग्रेस पार्टी, दूनों के आंतरिक सरवे रिपोरट के मानन त ये दफा कई विधायक मन अउ पूरव विधायक मन के टिकट कटे के आसार प्रबल हे। अइसे म प्रत्यासी चयन दूनों ही प्रमुख दल मन बर एक बड़ चुनवती हे। खैर दूनों ही दल मन म अपन-अपन रननीति के खुलासा त कर ही दिस हे।
प्रदेस म चुनावी घमासान सुरू होत ही सबो के निगाह टिकट वितरन म टिक गेहे। छत्तीसगढ़ म नवंबर-दिसंबर म विधान सभा चुनाइ प्रस्तावित हे। अइसे म चुनाइ ले करीब छ: महीना पहिली जोगी कांग्रेस अउ आम आदमी पार्टी ह अपन प्रत्याशित घोसित कर ये मामली म राष्ट्रीय दल मन ल पीछु छोड़ दिस हे।
चुनाव म जीत-हार प्रत्यासी चयन म काफी हद तक निरभर करथे अउ ये बात ले इत्तेफाक रखत हुए कांग्रेस के राष्ट्रीय अध्यक्छ राहुल गांधी ह 15 अगस्त तक 90 फीसदी टिकट तय करे के घोसना करे हे। कांग्रेस प्रवक्ता आरपी सिंह के कहिना हे कि आलाकमान के निरदेश म अमल करे जात हे। सूत्र बतात हे के कांग्रेस ह अब तक आधे ले अधिक प्रत्यासी तय कर लिए गेहे। शेस घलो बेरा रहत तय करे के बात कहे जात हे।
हालांकि इन बात मन ले अलग बीजेपी कोनो के पदचिह्ना म चले के बजाय अपन बनाय रद्दा म ही चले के दुहाई देवत हे। भाजपा प्रवक्ता सच्चिदानंद उपासने के कहिना हे के हमन अपन पार्टी के निरदेश मन के अनुसरन करत हे। पार्टी के नीति के आधार म ही प्रत्याशा मन के नाम तय होंही। बाकि पार्टी मन ये मामला म का करत हे, उंखर हमार कोनो लेना देना नइए।
