आईपीएस जितेन्द्र शुक्ला के तबादला बनिस राजनीतिक अखाड़ा

अमित जोगी ह मुख्य निर्वाचन अधिकारी ल लिखिस पत्र

रायपुर. छत्तीसगढ़ म 15 बछर बाद सत्ता म आए कांग्रेस ह अपन दू महीना के कार्यकाल म अधिकारी मन के ताबड़तोड़ तबादला करिस हे. एमा पाछू के आठ मार्च के सरकार ह दू आईपीएस अधिकारी मन के तबादला करिस.

एमा सुकमा के एसपी जितेन्द्र शुक्ला के नाम घलो सामिल हवय.. शुक्ला ल सुकमा ले पुलिस मुख्यालय भेज देय गे हे. ए तबादला के बाद पाछू के रविवार के जितेन्द्र शुक्ला ह फेसबुक म एक पोस्ट करिस. ए पोस्ट के बाद सियासी गलियार मन म चर्चा के दउर सुरू हो गिस.

आईपीएस जितेन्द्र शुक्ला के तबादला के बाद पत्र वायरल होवत हे. कथित रूप ले आईपीएस शुक्ला ह सुकमा म एसपी रहत ए पत्र प्रभारी मंत्री कवासी लखमा ल लिखे हे.. वायरल होए ए पत्र म कथित तउर म आईपीएस शुक्ला ह प्रभारी मंत्री
के एक पत्र के जवाब देय हे. आईपीएस शुक्ला ह पत्र लिखना ही उंखर तबादला के वजह बताए जात हे.

कहे जात हे के, सुकमा जिला के प्रभारी मंत्री कवासी लखमा ह आईपीएस जितेन्द्र शुक्ला ल पत्र पाछू के 19 फरवरी ले एक पत्र लिखे रहिस हे. एमा सुकमा जिला के फूलबगड़ी थाना के प्रभारी सुरेन्द्र पामभोई ल तोंगापाल थाना के प्रभारी बनाए के बात मंत्री ह लिखे हे.

जनता कांग्रेस छत्तीसगढ़ जे के प्रदेस अध्यक्ष अमित जोगी ह आईपीएस जितेन्द्र शुक्ला के तबादला के सिकायत मुख्य निर्वाचन आयुक्त ले करे हे. अमित जोगी ह लोकसभा चुनाव ल प्रभावित करे के उद्देश्य ले एसपी के तबादला के आशंका जताइस हे.