सरगुजा अउ बस्तर म पार्टी के पैठ ल अधिक मजबूत बनाय के रणनीति बर कोर ग्रुप म होइस चर्चा

रायपुर। काली छत्तीसगढ़ पहुंचे बीजेपी अध्यक्ष अमित शाह ह इहां प्रदेश कोर कमेटी के बइठक लीस। बइठक म उमन ह जिहां पार्टी ल आदिवासी इलाका मन म फोकस करे के निर्देश दिस उहें बेकार के बयानबाजी म कुछु मंत्री मन ल क्लास लगाइस।
सूत्र मन के मुताबिक शाह ह प्रदेश के कुछु मंत्री मन उपर नाराजगी जाहिर करत हुए उमन ल विवादित बयानबाजी ले बचे के सलाह दीस हे। इती कुछु मंत्री मन के कामकाज म घलोक नाराजगी जताइस हे।। उमन ह सबों सदस्य मन ले बातचीत करिन। संगे- संग क्षेत्रवार संगठनात्मक कामकाज के समीक्षा घलोक करिस। बइठक म मुख्यमंत्री रमन सिंह समेत सबो आला नेता मवजूद रहिन हे। कोर कमेटी के बइठक म शाह ह विधानसभा चुनाव म जीते बर रणनीति तइयार करिन। आदिवासी इलाक मन खासके सरगुजा व बस्तर म उमन पार्टी के पैठ अउ अधिक मजबूत बनाय के रणनीति म कोर ग्रुप ले चर्चा करिस हे ।रविवार के संझा 6 बजे सुरू होइस बइठक 8 बजे तक बंद कमरा मे चलीस हे। बइठक के सुरुआत म प्रदेश म संगठन के कामकाज के ब्यौरा लेय गिस । येकर बाद सबो सदस्य मन ले अलग-अलग बात करिन।