chhattisgarh : अवइया शिक्षा सत्र ले जादा ले जादा स्कूल म ‘अंगना म शिक्षा 3.0‘, पढ़व

सबो बसाहट म एक्टिव मदर कम्युनिटी के होही गठन, हरेक बछर 25 अप्रैल के करे जाही अंगना म शिक्षा मेला के आयोजन

जय जोहार। छत्तीसगढ़ म माता ल जोड़के लइका मन ल घर म पढ़ाई सीखे म सहयोग दे बर ‘अंगना म शिक्षा‘ कार्यक्रम ल काफी अच्छा सफलता मिलीन हे । ए कार्यक्रम ल राष्ट्रीय स्तर म स्कॉच आवार्ड ले घलो नवाजे गेहे। राज्य म अभी तक पिछले दू बछर म ए कार्यक्रम ले तीन लाख ले जादा माता सक्रिय रूप ले जुड़ चुके हे अउ लईका मन के शिक्षा म महत्वपूर्ण योगदान देवत हे ।

अवइया शिक्षा सत्र ले जादा ले जादा स्कूल म लईका सुघ्घर पढ़वैय्या कार्यक्रम म निर्धारित अपेक्षित स्तर तक पहुंच सके, एखर बर ‘अंगना म शिक्षा’- 3.0 के आयोजन करे जाही । उल्लेखनीय हे कि मुख्यमंत्री भूपेश बघेल डहार ले राज्य म 14 नवम्बर 2022 के लईका मन के शिक्षा म गुणवत्ता सुधार बर सुघ्घर पढ़वैय्या कार्यक्रम सुरू करे के घोसना करे रिहीन ।

स्कूल शिक्षा विभाग ह ए संबंध म सबो जिला शिक्षा अधिकारी, जिला शिक्षा अउ प्रशिक्षण संस्थान के प्राचार्य अउ समग्र शिक्षा के जिला मिशन समन्वयक ल जिला के सबो अधिकारी, सबो विकासखंड स्तरीय अधिकारी, संकुल समन्वयक अउ जिला के सबो स्व-प्रेरित महिला शिक्षिका ल सक्रिय रूप ले शामिल करत हुए ए कार्यक्रम ल भव्य रूप ले आयोजित करे बर निर्देशित करे हे ।