एक नवा जिला अउ 25 नवा तहसील के सौगात, छत्तीसगढ़ म होगे अब 28 जिला

रायपुर। मुख्यमंत्री भूपेश बघेल हा प्रदेश म एक नवा जिला बनाए के ऐलान करे हें। ये जिला ‘गौरेला-पेण्ड्रा-मरवाही’ के नाम ले जाने जाही। जेला मिला के अब छत्तीसगढ़ म 28 जिला हो जाही। एकर अलावा 25 नवा तहसील भी बनाए जाही। स्वतंत्रता दिवस समारोह के दौरान मुख्यमंत्री हा एकर घोषणा करिन।

पुलिस लाइन मैदान म होय मुख्य समारोह म मुख्यमंत्री बघेल हा किहिन कि हमन प्रशासन ला जनहित के प्रति संवेदनशील बनाए बर एक तरफ जिहां अधिकारी-कर्मचारी मन ला अपन मूल काम म ध्यान दे बर सचेत करेन, उहें जवाबदेही तय करे बर ‘लोकसेवा गारंटी अधिनियम’ के कड़ई ले पालन सुनिश्चित करे हन। ओमन किहिन कि आज मैं एक अउ बहुप्रतिक्षित मांग ला पूरा करत एक नवा जिला बनाए के घोषणा करत हंव।

मुख्यमंत्री हा ये घोषणा भी करिन कि सरकार के तरफ से गौठान समिति मन ला प्रतिमाह 10 हजार रूपया के सहायता दिए जाही, जेमा गौठान म काम करइया चरवाहा मन ला मानदेय समेत अउ दूसर इंतजाम करे जाही।

अब प्रदेश निवासी अनुसूचित जनजाति ला 32 प्रतिशत, अनुसूचित जाति ला 13 प्रतिशत अउ अन्य पिछड़ा वर्ग ला 27 प्रतिशत आरक्षण प्रदान करे जाही।
‘लेमरू एलीफेंट रिजर्व’ के घोषणा भी होईस। ये हा दुनिया म अपन जइसे पहिली ‘एलीफेंट रिजर्व’ होही, जिहां हाथी मन के स्थायी ठिकाना बने ले उंकर दूसर जगा मन म आवाजाही रूकही अउ एकर ले होवइया नुकसान भी नई होय।