जय जोहार…. बीजापुर जिला म कोरोना (corona) के एक अउ मरीज मिले हे। एला मिला के जिला म अब कोरोना संक्रमण के तीन मामले हो गे हे। एखर पुष्टि ल बीजापुर सीएमएचओ बीआर पुजारी ह करे हे।
बता देन कि कोरोना (corona) संक्रमित युवक ह 2 जुलाई के तेलंगाना ले लहुटे रिहिस, जेखर बाद ओला पोटाकेबिन मुरकीनार म क्वारेंटाइन करे गे रहिस। आज आरटीपीसीआर म ओखर रिपोर्ट ह कोरोना पाजिटिव आय हे। एखर संग दू अउ साथी क्वारेंटाइन करे गे हे।
संक्रमित मरीज ल जगदलपुर मेडिकल कालेज हास्पिटल म शिफ्ट करे गे हे। पाजिटिव मरीज मिले के बाद पोटाकेबिन मुरकीपार ल कन्टेनमेंट जोन घोसित कर दे गे हे।
गौरतलब हे कि छत्तीसगढ़ म कोरोना (corona) के संख्या ह सरलघा बाढ़त जावत हे। बीते सोमवार के 98 नवा मरीज के पहचान होय हे। एखर संग संक्रमित मन के संख्या ह 3307 हो गे हे।
एखर आलावा राजनांदगांव ले 21, रायपुर ले 18, जगलपुर ले 17, बलौदाबाजार ले 8, बिलासपुर ले 7, सूरजपुर ले 6, जांजगीर-चांपा ले 5, बेमेतरा ले 3, दुर्ग, महासमुंद, कोरबा, बलरामपुर, सरगुजा, दंतेवाड़ा अउ नारायणपुर ले एक-एक मरीज संक्रमित मिले हे।
