एके संघरा अढ़ई सौ लईका पढ़ सकत हे, 68 साल पहली बने लाइब्रेरी म विकसित दे गे हे आधुनिक सुविधा
रायपुर. प्रतियोगी परीक्षा बर वाई-फाई कैम्पस, डिजिटल क्लास रूम, ई-लाइब्रेरी अऊ कैंटिन के सुविधा ले युक्त रायगढ़ के हाईटेक जिला लाइब्रेरी के लोकार्पण मुख्यमंत्री भूपेश बघेल 1 जून के दिन करही। ए लाइब्रेरी म तैयार करे गे एसी स्टडी रूम एके सघरा अढ़ई सौ लईका मन पढ़ाई कर सकथे। जिला प्रशासन के पहल ले 68 साल पुराना लाइब्रेरी ल पूरा तरीका ले रिनोवेट करे गे हे। इहां छात्र मन बर कई सुविधा ल बढ़ाए गे हे। किताब अऊ फर्नीचर ल घलो अपग्रेड करे गे हे। इहां शहर के लईका मन ल पढ़ई-लिखई के संगे-संग प्रतियोगी परीक्षा के तैयारी बर घलो सुघ्घर माहौल तैयार करे गे हे।
बता देन कि रायगढ़ के ए पुस्तकालय 68 बछर जुन्ना आए। जिला गजेटियर के हिसाब ले बछर 1955 म एखर स्थापना करे गे रिहिस। बछर 1964-65 म शासकीय पुस्तकालय रायगढ़ म लगभग 7,000 पुस्तक रिहिस अऊ एखर 281 सदस्य रिहिन। अब लाईब्रेरी म 23 हजार ले ज्यादा किताब पढ़े बर उपलब्ध हे। लाइब्रेरी ल आधुनिक तकनीक ले अपग्रेड करे गे हे। संगे-संग पूरा कैंपस ल वाई-फाई ले युक्त करे गे हे। ऑनलाइन पढ़ई बर 20 कंप्यूटर घलो लगाए गे हे। लाइब्रेरी म स्टडी मेटेरियल प्रिंट करे के घलो सुविधा छात्र मन ल मिलही। एखर अलावा इहां एक डिजिटल क्लासरूम घलो बनाए गे हे, जेमा आधुनिक तकनीक के उपयोग कर एक संघरा 30 छात्र पढ़ई कर सकत हे। उहें ग्रुप स्टडी बर घो अलग कुरिया बनाए गे हे।
ए लाइब्रेरी के रेनोवेशन म खास बात ए हे कि इहां बड़ा शहर मन के तर्ज म स्टडी केबिन घलो बनाए गे हे। ए हा छात्र मन बर व्यक्तिगत स्टडी टेबल जईसन होही। जेखर ले छात्र लाइब्रेरी म एकाग्रचित होके पढ़ई कर सकत हे। इहां अईसे लगभग 180 केबिन तैयार करे गे हे। ए लाइब्रेरी बिहनिया 8 बजे ले रात 10 बजे तक छात्र मन बर खुले रही। एखर अलावा ई-लाइब्रेरी के सुविधा घलो छात्र मन ल मिलही। लाइब्रेरी म प्रतियोगी परीक्षा के तैयारी बर बिसेस फोकस करत ओखर ले संबंधित जरूरी किताब अऊ मासिक मैगजीन घलो इहां छात्र मन बर उपलब्ध होही।
