छत्तीसगढ़ म मोदी के एक अउ गारंटी पूरा, भूमिहीन मजदूर मन ल मिलहि फायदा

रायपुर : छत्तीसगढ़ म भूमिहीन मजदूर मन ले करे गे वायदा के अनुरूप प्रधानमंत्री मोदी के एक अउ गारंटी पूरा हो गे हे। हमर छत्तीसगढ़ म बड़का आबादी कृषि म निर्भर करत हे, लेकिन अइसे लोगन घलो हें जेखर तीर कृषि भूमि घलो नइ हे अउ ओ कृषि मजदूरी करके जीविकोपार्जन करत हें। ओमन ल ध्यान म रखत हमन भूमिहीन कृषि मजदूर भाई-बहिन ले घलो एकठन वादा करे रेहेन कि ओमन ल 10 हजार रुपया सालाना आर्थिक सहायता देबो। आज हमन ए वादा ल पूरा करे हवन। मुख्यमंत्री विष्णु देव साय ह आज न्यू सर्किट हाउस स्थित आडिटोरियम म पंडित दीनदयाल उपाध्याय भूमिहीन कृषि मजदूर कल्याण योजना के शुभारंभ करत  ए बात ल कहिन।

मुख्यमंत्री ह कहिन कि राज्य के कुल 5 लाख 62 हजार 112 हितग्राही मन ल ए योजना के लाभ मिले ल जात हे। ए योजना के तहत पाँच सौ 62 करोड़ 11 लाख 20 हजार रुपया हमन भूमिहीन कृषि मजदूर मन ल प्रदान करबो। मुख्यमंत्री ह कहिन कि पंडित दीनदयाल उपाध्याय भूमिहीन कृषि मजदूर कल्याण योजना ल शुरू करे के पीछे हमर उद्देश्य भूमिहीन कृषि मजदूर परिवार मन के शुद्ध आय म वृद्धि करके ओमन ल आर्थिक रूप ले संबल प्रदान करना हे। ए योजना म भूमिहीन कृषि मजदूर मन के संग वनोपज संग्राहक भूमिहीन परिवार, चरवाहा, बढ़ई, लोहार, मोची, नाई, धोबी आदि पौनी-पसारी व्यवस्था ले संबद्ध भूमिहीन परिवार घलो शामिल हे। एखर अलावा अनुसूचित क्षेत्र म आदिवासी मन के देवस्थल म पूजा करइया पुजारी, बैगा, गुनिया, माँझी  परिवार मन ल घलो शामिल करे गे हे। मुख्यमंत्री साय ह भूमिहीन मजदूर हितग्राहि मन ल 10 हजार रुपया के  राशि के चेक वितरित करिन।

मुख्यमंत्री ह कहिन कि ए ऐतिहासिक कदम के माध्यम ले प्रदेश के भूमिहीन मजदूर परिवार मन के आर्थिक समृद्धि ल जेन संकल्प हमन लिया रहेन, वो आज साकार होवत हे। ए योजना न केवल उखर आर्थिक स्थिति ल मजबूत करहि, बल्कि उखर लइका मन के शिक्षा, स्वास्थ्य अउ भविष्य ल घलो सुरक्षित बनाहि। ओमन ह कहिन कि हमर उद्देश्य हे कि प्रदेश के हर गरीब अउ भूमिहीन परिवार खुशहाल होवय। ए योजना उखर जीवन म सकारात्मक बदलाव लाए के माध्यम बनहि।

मुख्यमंत्री विष्णु देव साय ह कहिन कि हमर यशस्वी प्रधानमंत्री नरेन्द्र मोदी ह छत्तीसगढ़ के जनता ल जेन गारंटी दे रहिन, ओमा ले अधिकांश गारंटी ल हमर सरकार ह महज एक बछर के भीतर पूरा कर देय हे। शपथ लेय के दूसर दिन पहली कैबिनेट म हमन जरूरतमंद 18 लाख  परिवार मन ल प्रधानमंत्री आवास के स्वीकृति देय हवन। हमर सरकार ह पीएम आवास बर पात्रता के दायरा घलो बढ़ा दिन हे। अब जेखर तीर दुपहिया वाहन हे, ढ़ाई एकड़ सिंचित भूमि या पाँच एकड़ असिंचित भूमि हे, जेखर मासिक आय 15 हजार रुपया हे, वो घलो पीएम आवास बर पात्र होहि। हमन राज्य म आवास प्लस बर सर्वे के काम घलो शुरू कर दे हवन। छत्तीसगढ़ के हर नागरिक तक सुशासन के लाभ पहुंचय, हमर सरकार इही प्रयास करत हे।