कोयलिया असन आवाज के धनी अनुपमा मिश्रा ह बनीस जोहार सितारा , दीपक बावनकर ह करीस गोठबात

जय जोहार डॉट कॉम के सेगमेंट जोहार सितारा म ए बार के सितारा बने हावे मशहूर गायिका अनुपमा मिश्रा ह , अनुपमा ल भले ही बहुत झन देखे नहीं होय होही लेकिन ओखर आवाज छत्तीसगढ़ के एक एक सिने प्रेमी मन खूब पसंद करथे। जब छत्तीसगढ़ म आज के जईसे स्टूडियो नई रिहिस तब के गाना गावत अनुपमा मिश्रा आज भी अपन आवाज के जादू बिखेरथ हे, वर्तमान में जेन छत्तीसगढ़ी फिलिम ह धूम मचावत हे ओखरो गीत म अनुपमा ह आवाज दे हवे।

ओखर नाम हे ” हंस झन पगली फंस जबे ”   गोठबात म अनुपमा ह बताइस कि पहली संगीतकार और गायक मन एक साथ काम करे लेकिन आज टेक्निकली अतना मजबूती आ गे हे कि संगीतकार संगीत दे के चल देथे फेर गायक ह आके गाना गाथे। आज से 15 साल पहली एक एल्बम आये रिहिस “सतरंगी रे” जेखर गाना आज भी लोगन मन भूले नई हे, वो एल्बम म अनुपमा जी के आवाज रहीस। तब ले आज तक नवा नवा अंदाज में गायकी चलत हे अनुपमा के ।

लइकापन म ओला माँ बाबू के सहयोग मिलिस, बिहाव के बाद पति और सास-ससुर के सहयोग मिलिस तभे अनुपमा अपन घर परिवार के जिम्मेदारी निभात हुए नौकरी घलोक करथे। हर तरह के गीत म आवाज दे चुके अनुपमा छत्तीसगढ़ के जम्मो दर्शक मन ल धन्यवाद देथे जेन मन उंखर आवाज ल पसंद करथे , सुनथे,अउ मया देथे।

अनुपमा कईथे कि ये ऊही दर्शक मन के आशीर्वाद हे कि में आज ये मुकाम तक पहुंचे हो । अनुपमा कभु मुंबई म जा के कैरियर बनाये के बारे में नई सोचिस, काबर की ओला जेन मान सम्मान के आस रिहिस वो ओला अपन छत्तीसगढ़ म मिल गे हे। त बहुत जल्दी आवत हे सर्वश्रेष्ठ गायिका अनुपमा मिश्रा ले गोठ बात आपके अपन जय जोहार डॉट कॉम म त देखत रहव जय जोहार डॉट कॉम हमर माटी हमर भाखा।