जशपुर। जिला म तीन दिन ले लगातार होवत मूसलाधार बारिस ह अफसर मन के पोल खोल के रख दीस हे। ये बारिस ले बेलसुंगा जलाशय के मुख्य नहर म बने पुलिया टूटके बह गिस। पुलिया टूटे ले करीबन 10 गांव के संपरक जिला मुख्यालय ले कट गे। अब इहां के निवासी मन ल परेसनी के सामना करना पड़त हे। मामला कुनकुरी ब्लॉक के बेलसुंगा के हे, जिहां 20 लाख के लागत ले बने पूल बारिस के पानी ले टूटके बहिगे। अब स्थानीय लोगन ल रोज के उपयोग के वस्तु मन बर 12 किलोमीटर के लंबा रास्ता तय कर के रनपुर आना पड़त हे। स्कूली लइका मन ल घलो लंबी दूरी तय करना पड़त हे। अफसर मन के भ्रष्टाचार के सजा अब ग्रामीन मन अउ लइका मन ल मिलत हे।
