बाप ले बढ़के होगे संपत्ति.. बेटा ह गला दबईस त बहू लोड़हा लेके मारे बर दौड़ाईस… कहां जावत हे हमर समाज

बिलासपुर. संपत्ति म हिस्सा नई दे ले नाराज एक युवक ह पाल पोसके बड़े करईया अपनेच पिता के गला दबा के जान ले के कोशिश करे हे। इही नहीं वृद्ध पिता ह जब बचे के कोशिश करत रहिस तब ए सपूत के बीबी ह ओला लोड़हा ले के मारे बर घलो दउड़ा दिस। कोनों तरह ले वृद्ध ह उहां ले भागके अपन जान ल बचईस अऊ थाना म रिपोर्ट घलो करवईन।

मामला बिलासपुर के कोतवाली थाना इलाका के हरे जिहां पुलिस ह बेटा अऊ बहु के खिलाफ रिपोर्ट दर्ज करे हे। फेर अभी तक मामला म आरोपी मन के गिरफ्तारी नई होए हे। बताए जात हे कि दूनों झन मिलके अब्बड़ दिन से पिता ल परेशान करत हे। वृद्ध पिता टिकरापारा यादव मोहल्ला निवासी पुनीराम यादव मजदूरी करथे अऊ ओखर 5 बेटा हे। जम्मो लईका मन के बिहाव हो गे हे अऊ सबो अलग रहिथे।

ओखर छोटे बेटा देव कुमार यादव उर्फ बंटी ह एक महीना पहिली तक पुनीराम के संग रहत रिहिस। फेर आए दिन के झगड़ा ले परेशान होके पुनीराम अलग रहत रिहिस। आरोप हावे कि देव कुमार अपन पत्नी संग पुनीराम के मकान म अईस अऊ उपर म एक अऊ कमरा के मांग करे बर लागगे। कमरा दे बर पुनीराम इंकार कर दिस। एखर बाद ऐ घटना होए के आरोप पिता ह पुलिस मेर लगावत हे।