सीएम हाउस घेराव बर निकले भूपेश समेत कई आला नेता गेरफ्तार

रायपुर । महंगाई, महिला मन उपर होवत अत्याचार, भ्रष्टाचार, किसान मन के अनदेखी, बदहाल स्वास्थ्य बेवस्था जइसे मुद्दा मन ल लेके सोमवार के युवा कांग्रेस ह मुख्यमंत्री आवास घेरे के कोसिस करिन। घेराव म कांग्रेस पीसीसी चीफ समेत बड़ नेता घलो सामिल रहिन हे। ये दउरान पुलिस के संग जमके झूमाझटकी होइस। पुलिस ह पीसीसी चीफ भूपेश बघेल समेत कई नेतामन ल गेरफ्तार कर लिस अउ कारय करता मन ल सीएम आवास के भीतर घुसे ले रोक दिस।
सीएम आवास के पास पहुंचत ही पुलिस बल ह कांग्रेसी मन ल रोक दिस। कुछु कारयकरता मन ह गेट फांदके आवास म घुसे के कोसिस करिन। ये दउरान पुलिस के संग जमके झूमाझटकी होइस हे। भीड़ ल बेकाबू होत देख पुलिस उग्र होगे । अउ पुलिस ह भूपेश बघेल, पार्टी के वरिष्ठ नेता सत्यनारायण शर्मा, छत्तीसगढ़ के प्रभारी सचिव डॉक्टर चंदन यादव, संचार विभाग के अध्यक्ष शैलेश नितिन त्रिवेदी अउ रायपुर महापौर प्रमोद दुबे समेत कई अन्य नेता मन ल गेरफ्तार कर लिस। हालांकि बाद म सबो लरिहा कर दे गिस।
नेता मन ह सभा ल करिन संबोधित
राजीव गांधी चउक म आयोजित सभा ल संबोधित करत हुए भूपेश बघेल कहिन के रमन सरकार ले जनता के विस्वास पूरी तरह ले उठ चुके हे आज छत्तीसगढ़ म 19 लाख पंजीकृत युवा रोजगार के तलास म भटकत हे। 27 हजार महिला मन लापता हे। लगातार कभु समरथन मूल्य के नाम म कभु फसल बीमा के नाम म किसान मन के संग छलावा होवत हे। स्वास्थ्य बिभाग के बदहाली के आलम सबो ल पता हे।