जय जोहार मगरलोड…. धमतरी जिला के मगरलोड के ग्राम राकाडीह मधुबन धाम म भगवान राम ह अपन वनवास के कुछु समय ल घलो बिताए रहिस। छत्तीसगढ़ म ओहा जिहां रूकिस अऊ जिहां ले गुजरे रहिस प्रदेश सरकार ह उन सबो स्थल मन ल राम वनगमन पर्यटन परिपथ के नाम ले विकसित करे के निर्णय लिए हे। धमतरी जिला म घलो कुछु अइसे स्थान हे, जिहां ले भगवान राम ह अपन वनवास के दौरान गमन करे हे।
राज्य सरकार ह प्रदेश के जे स्थल मन ल चयन भगवान राम के वनगमन मार्ग बर चिन्हांकित करे हे। ओमा धमतरी जिला के विकासखंड मगरलोड के मधुबन धाम के नाम ले विख्यात हे। वनवास के दौरान भगवान राम ह पत्नी सीता अऊ भाई लक्ष्मण के संग पंचमुखी हनुमान आश्रम म ठहरे रहिस।
अब राज्य सरकार ह ए स्थल मन ल विशेष रूप ले विकसित करे के निर्णय लिए हे। आज प्रदेश के मुख्य सचिव आरपी मंडल ह मुख्य वन संरक्षक राकेश चतुर्वेदी, पर्यटन सचिव पी अलबलगन के संग ग्राम पंचायत राकाडीह के मधुबन धाम पहुंचिस।
इहां पहली भगवान राम जानकी के पूजा-अर्चना कर प्रदेश के खुशहाली के कामना करिस अऊ फेर मधुबनधाम के प्रमुख धार्मिक अऊ पर्यटन स्थल मन के विकसित करे बर जिला अधिकारी मन ले चर्चा करिस। ए दौरान पर्यटन विभाग ल 10 दिन के भीतर विस्तृत कार्ययोजना बना के प्रस्तुत करे बर निर्देश दिस।
