रेल पटरी म बइठ के पियत रिहिस दारू, मना करिस सिपाही त ओकरे डंडा म ओकरे पिटई

बिलासपुर. रेलवे पटरी म बइठके दारू पियत देखके पुलिस सिपाही हा मना करिस त ओकरे डंडा ल छीन के ओकरे पिटई कर दे गिस।

जानकारी के अनुसार सकरी थाना के कांस्टेबल वीरेंद्र भोई हा डायल 112 म ड्यूटी करथे। सोमवार रात के 11.55 बजे उसलापुर ओवरब्रिज करा आरोपी अनिमेश शुक्ला हा अपन साथी मन के साथ रेलवे ट्रैक म शराब पियत रिहिस।

मना करे ले ओ भड़क गे अउ गाली दे लगिस। अउ डंडा लेके सिपाही के पिटई सुरू कर दिस। मोबाइल ला घलो छीन लिस। ड्राइवर हा बीच बचाव करिस।

फोन म सिपाही हा कंट्रोल रूम ल जानकारी दिस त सकरी पुलिस पहुंचिस। सायरन सुनके अनिमेश शुक्ला अउ ओकर साथी मन उहां ले भाग गें। सिपाही हा सिविल लाइन थाना म रिपोर्ट दर्ज कराए हे।